Trahedya dulot sang kurapsyon

Julio Montana | Spokesperson | Panay Regional Operational Command | New People's Army
March 02, 2020
Share and help us bring this article to more readers.

Nagapakig-unong kag nagasimpatiya ang mga pulang hangaway kag kumander sang New People’s Army sa idalom sang Coronacion “Waling-Waling” Chiva Command NPA-Panay sa mga pamilya sang mga nabiktima sang trahedya nga na-angkon sang mga kapulisan sang 601st Regional Mobile Force Battalion sang nagligad nga Pebrero 29, 2020 sa Alimodian, Iloilo.

Sa 30 ka mga pulis nga sakay sang dumptruck, 26 ang nasamaran kag 4 ang gilayon nga napatay sa aksidente. Halin sa combat operations sa binukid sang Alimodian ang mga kapoy nga tropa sang kapulisan. Bangod wala sang salakyan nga magakarga sang ila tropa, ginhulam sang PNP sa munisipyo sang Alimodian ang dumptruck para sa ila transportasyon. Nadulaan ini sang preno kag nahulog sa pil-as sa Brgy. Ginomoy, Alimodian pila na lang ka metros ang kalayuon sa ila batalyon hedkwarter.

Ngaa nagahulam sang salakyan sang LGU ang PNP?

Athag sa publiko nga binilyon ang pondo sang PNP sa idalum sang gobyerno ni Duterte. Sa matuod, prayoridad pa gani ni Dutere ang pag-pabaskog sang kapasidad sang iya mga kapulisan kag armado nga tropa para sa kontra-insurhensya. Samtang bilyon ang pondo para sa PNP modernization, naga-antus ang mga tropa sini sa mga pagalpalon nga kagamitan kag kawawad-on sang pasilidad para sa ila.
Wala nagatupa ang modernization sang PNP bangud sa duna nga kurapsyon sa ila institusyon. Ang mga heneral kag matag-as nga opisyal sang PNP ang nagapagusa sa binilyon nga pondo samtang naga-antus ang ila mga tinawo sa idalum. Matandaan nga naupod sa iskandalo ang mga opisyal sang kapulisan sa Iloilo sa ma-anomalya nga pagbakal sang mga baratuhon nga combat boots para sa ila tropa pila ka tuig na ang nagligad. Dugang pa, nag-report mismo ang Ombudsman sang reaksyunaryo nga gobyerno sadtong 2016 nga ang PNP kag Armed Forces of the Philippines ang pinaka-kurakot nga mga ahensya sang gobyerno humalin 2011.

Sa diin nagakadto ang binilyon nga pondo sang PNP modernization program? Kon indi mapatay sa inaway, mapatay sa pagpatumbaya ang mga tropa sang reaksyunaryo nga gobyerno.
Ginahangkat namon ang mga kapulisan nga mangin kritikal kag analitikal sa sini nga panahon. Indi magpanginwala sa hayagan nga kurapsyon kag abuso sang poder nga nagakatabo sa sulod sang PNP.

Trahedya dulot sang kurapsyon