Serial Killings sa Panay, Kahimuan sang PNP

Julio Montana | Spokesperson | Panay Regional Operational Command | New People's Army
October 15, 2018
Share and help us bring this article to more readers.

Julio Montana
Tagpamaba
Coronacion Chiva “Waling-Waling” Command
New People’s Army – Panay Region

Halin sang pagpungko ni Chief Superintendent John Bulalacao bilang Regional Director sang PNP halos wala sang bulan, umpisa sang Hunyo 24, 2018, nga wala sang sunod-sunod nga pagpamatay sang mga sibilyan nga ‘kuno imbolbado sa druga’. Kon indi ang mga naka-uniporme nga mga Death Squads nga PNP, PDEU, RDEU ukon PDEA ang may kahimuan, ang kay Bulalacao nga wala nakauniporme nga mga Death Squads nga riding in tandem ang nagatigayon sang mga marder.

Si Bulalacao lang kag ang iya pulis ang wala naalarma sa asud-asod nga pagpamatay nga nagalab-ot na sa masobra 20 ang mga kaso sang marder paagi sa ekstra-hudisyal nga pagpamatay. Isa sang ginpatay sa Roxas City, Capiz amo si Atty Edeljulio Romero nga anay abogado sang pinatay man nga druglord nga si Melvin Odicta. Ginasulit-sulit lamang sang PNP ang ila inutil nga balibad nga kuno mga isolated cases ang mga ini kag under investigation pero bisan isa ka suspek wala sila sang matudlo.

Ang matuod amo nga butigon si Bulalacao, si Senior Superintendent Marlon Tayaba sg IPPO kag ang bilog nga kapulisan sa rehiyon. Ang matuod amo nga ang mga pagpamatay kahimuan sang estado, ginatugutan sang berdugo nga Presidente kag ang nagahimo sini sa idalom sang direksyon kag mando sang tsip idu-ido ni Duterte sa PNP nga amo ang Regional Director mismo.

Para sa impormasyon sang tanan, si John Bulalacao ang PNP Provincial Director sang Bulacan sang 2017 sa panahon nga 32 ka tawo ang ginpamatay sang iya kapulisan sa sulod sang isa ka adlaw lamang halin 12:00am Agosto 15 asta 12:00am Agosto 16 sa ngalan sang Tokhang. Ang ini nga pagmasaker sang mga suspetsado pa lang, ang gindayaw ni Duterte kag gin-engganyo ang iya bayaran nga pulis nga maayo nga sundon ang pagpatay adlaw-adlaw sang 32 ka suspek (bisan wala mapamatud-an) agod malubad ang problema sa druga.

Sobra na duha ka tuig ang pamatay ni Duterte kag iya mga bounty-hunter nga pulis kag militar nga nag-abot na sa masobra 23,000 ang patay sa ngalan sang kontra-druga pero druga pa kuno gihapon ang pinaka-problema sang pumuluyo sa Pilipinas. Samtang nagakamang na sa kapigaduhon kag nagakalamatay ang pumuluyo sa balatian tuga sang gutom kag kaimulon, ang solusyon sang kriminal nga Presidente kag iya dilap-sa-buli nga bayaran nga pulis kag militar amo ang wala kutod nga pamatay sa ngalan sang kontra-druga, kontra-terorismo, kontra-insurhensya sa idalom sang US-directed program nga Oplan Kapayapaan.

Ang delikado subong amo ang gina-engganyo sang estado nga linya sang pamensaron kag kaisipan nga bangod ang gin-marder mga high-value targets, ukon ara sa watch list, ukon drug surrenderer nga nagbalik, OK lang nga mapatay sila sang mga death squads nga indi kuno ma-identify kag madakop-dakop sang pulis ukon militar ang mga may kahimuan.

Pero na-identify si PO1 Melvin Mocoro nga amo ang nagluthang kay PO2 Dorben Acap, ang 2 ka aktibo nga mga Phil Marines nga nagpatay sa isa ka retired Phil Army Captain nga si Joren Bañas kag ang pulis intel nga si SPO4 Rene Matulac nga ginatudlo sang pamilya sang pinatay nga si Brgy Tanod Niel Resma. Ano ang aksyon ni Bulalacao sini?

Wala aksyon si Bulalacao bangud siya mismo ang pasimuno sang pinagusto nga pamatay sa tanan nga probinsya sang Panay kag mga syudad sang Iloilo kag Roxas. Siya ang pinakamasupog nga tagapatuman ni Duterte sang wala-konsensya kag brutal nga pamatay a la Marcos kag a la Hitler sa tuyo nga kontrolon ang kahadlok kag pamensaron sang pumuluyo.

Apang indi ini magdugay, ang tanan nga pasista nga paghari may katapusan. Indi ini magdugay bangod ang pumuluyo mismo maga-alsa kontra sa diktadurya kag tiraniya. Kag ara ang New People’s Army nga amo ang mapalapitan sang pumuluyo, magapangapin sang ila mga kinamatarung kag magadugmok sa kaaway sang masa.

Serial Killings sa Panay, Kahimuan sang PNP