Salvador Hisuan – indi aktibo nga katapo sang NPA

Julio Montana | Spokesperson | Panay Regional Operational Command | New People's Army
October 15, 2018
Share and help us bring this article to more readers.

Luyag athagon sang Coronacion Chiva “Waling-waling” Command nga si Salvador Hisuan indi aktibo nga katapo sang ano man nga yunit, opisina ukon organisasyon sang New People’s Army.

Baliskad ini sa gin-anunsyar ni Col Benedict Arevalo sg 301st Infantry Brigade nga “si Hisuan amo ang kumander sang Regional Sentro de Grabidad (RSDG) yunit kag sang Regional Operations Command (ROC).” Gina-insistir ni Arevalo nga aktibo pa nga myembro sang NPA si Hisuan para magkuha sang pogi points sa iya kredito kag agod magdugang sang sabor sa ginaluto nga kabutigan sang AFP nga Red October nga binawi na sang DND Secretary Delfin Lorenzano bangod wala ginpatihan sang publiko.

Si Hisuan ginkakas na sa listahan sang NPA halin sang mag-AWOL siya sang Septyembre 2014. Sang madakpan siya sang Oktubre 9, 2018 sa syudad sang Iloilo gin-ako mismo ni Hisuan nga sang 2014 nagsurender na siya sa kay Lt Col Magbalot sang 61st IB.

Lubos man nga kabutigan ang ginpahambog sang pamunuan sang 61st IB nga sa amo man nga adlaw nagsurender ang tatlo ka kuno NPA nga mga katapo sang “Strike Force of Sentro De Grabidad (SDG) of the NPA of Central Front, Komiteng Rehiyon-Panay” nga amo sanday Marlon Castor Lozada alias Niko, 34; Jomar Camarig Depalubos alias PG, 29, pareho nga residente sang Sitio Inuscan, Barangay Cahigon, Calinog, Iloilo; kag Pablito Lozada Depalubos alias Atlas, 49, residente sang Sitio Tinabasan, Barangay Buri, Tapaz, Capiz.

Sandig sa opisyal nga rekord sang NPA-Central Front, si Marlon Castor Lozada alias Niko ginkakas na sa listahan sang NPA-Central Front umpisa pa sang 2008 kag makapila na ka beses nga nagsurender sa militarya. Samtang ang duha pa ka ginsambit nga surrenderers ang wala sa listahan kag indi nangin kabahin sang ano man nga yunit sang NPA sa idalom sang NPA-Central Front.

Wala sang iban nga katuyuan ang pagpresentar sang militarya sang mga fake kag recycled surrenderers kundi ang pagbulsa sang mga mataas nga opisyal sini sang minilyon nga pondo sa idalom sang ila programa nga E-CLIP ukon Enhanced Comprehensive Local Integration Program, isa ka peke nga programa sa pagpasurender. Luyag man ipakita sang pamunuan sang 301st Inf Bde kag 61st Inf Bn nga nagaluya na ang pwersa sang NPA sa isla.

Indi mapunggan sang anuman nga psyops sang AFP kag PNP, pareho sang ila pagpresentar sang mga peke kag recycled nga mga surenderers, ang padayon nga pagbaskog sang armado nga rebolusyonaryo nga pwersa sa isla. Pat-ud nga madamo pa ang mapartisipar sa armado nga paghimakas kag magpatapo sa NPA bangud sang nagapalala nga kaimulon, kapigusan kag madamuan kag lapnagon nga pagpamatay ukon ejk sa idalom sang tiraniko nga paghari sang berdugo nga Pres. Duterte sa pagpatuman sini sang Oplan Kapayapaan, Oplan Tokhang, TRAIN kag ibanpa nga mga programa nga nagabiktima sang pumuluyo labi na ang mamumugon kag mangunguma sa kaumhan kag mga komunidad sang mga imol-sa-syudad.

Salvador Hisuan – indi aktibo nga katapo sang NPA