Sabat sang LPC-NPA sa mga Kabutigan ni Col. Igberto Dacoscos sang 62nd IBPA

JB Regalado | Spokesperson | NPA-Central Negros (Leonardo Panaligan Command) | Negros Island Regional Operational Command (Apolinario Gatmaitan Command) | New People's Army
January 28, 2019
Share and help us bring this article to more readers.

 

Nadumduman sadtong Enero 22, 2019 ginpahug kag pwersa nga ginpatambong sang combined forces sang 62nd IBPA kag 94th IBPA ang mga residente sang sityo sang Acasia, Tubod, Brgy. proper sang Brgy Macagahay sakop sang Magallon, Negros Occidental kag mga pumuluyo sang sityo Cambairan, Amumuyong, Columbia kag iban pa nga mga sityo sang Brgy. Trinidad, Guihulngan, Negros Oriental sa ginpatigayon sini nga pulong-pulong sa sityo Cambairan, Trinidad, Guihulngan.

Sa maid-id nga imbestigasyon sang LPC, consistent ang pumuluyo nga nagapanugiron nga gingamit sang militar ang mga 4P’s beneficiaries lamang padakuon ang numero sang magtambong sa nasambit nga aktibidad. Dugang pa nila, ginpangakuan sila nga hatagan sang mga gamit panguma kaangay sang sadol, guna, pala kag iban pa.

Suno man sa mga pumuluyo, kon magsurender sila bilang mga suporter sang NPA, hatagan sila sang tag P450,000 nga cash incentives. Ini isa ka klaro nga pagpanginto, pagpatalang kag pagpanghaylo sa pumuluyo para sa dugang naman nga pagtinambak nga kaso sang korapsyon kag pangulimbat sang militar sa kaban sang gobyerno gikan sa buwis sang pumuluyong Pilipino.

Sini man nga pulong-pulong, nagapangakig ang mga katapo sang militar nga naga-atubang sa mga tumalambong kag pilit man ini nga ginpasinggit nga “MGA NPA KAWATAN!” kay ang mga baboy kag baka sang pumuluyo kuno ginpangawat sang NPA. Sa una kag ikaduha nga higayon sa pagpasinggit sa ila, wala nagtuman ang pumuluyo apang sa ikatatlo napilitan ang pipila sa ila nga nagsinggit dala ang pangyam-id kay namwersa na ang mga opisyal sa 62nd IB kag 94th IB samtang pilit man sila nga ginakuhaan sang video kag litrato.

Ini maathag nga human rights violation kag paglapas sa mga kasugtanan sa CARHRIHL. Lunsay psywar kag deception ang ginhimo sang 62nd IB kag 94th IB sa pumuluyo sang Magallon kag Guihulngan.

Kabutigan man ang ginataghol ni spokesperson Benedict Arevalo sang 303rd BdePA nga ginpahug sang NPA ang mga pamatan-on sa Magallon kag Guihulngan. Ang matuod nahadlok lang si Arevalo nga magpasakop sa NPA ang nasambit nga mga pamatan-on. Segurado ang LPC-NPA nga kon magpadayon ang militarisasyon, pagpanghalit sa pangabuhian kag kabuhi sang mga mangunguma kag iban pa nga porma sang kalakasan sang militar sa kaumahan, maga-usbong ang inaway banwa kag armadong paghimakas sa Central Negros nga pagapasakupan sang mga pamatan-on, aktibista kag iban pa nga mga demokratikong pwersa para pangita-on ang matuod nga hustisya sandig sa proseso sang rebolusyonaryong hustisya.

Nagakahulugan nga militar mismo kag si Duterte ang nagarekrut sa NPA kag nagapalig-on sini.

Daw idu-buang man si Col. Dacoscos sang 62nd IBPA nga nagataghol gamit ang gindrawing nga istorya nga kuno ang NPA nagdetain sang 3 ka adlaw sa isa ka mangunguma nga si alyas “Dodong” sa sityo Cambairan, Trinidad, Guihulngan. Subong man nagkuha kag nagguba kuno sang cellphone sini. Ini klaro nga lunsay kabutigan kag pagpatalang.

Lip serving man ang pagpanghangkat ni Col. Dacoscos sang 62nd IB sa mga human rights advocates nga mag-imbestiga sang pumuluyo sa kaumahan ilabe na sa Magallon kag Guihulngan. Ang matuod militar man ang nagapugong mismo sa nasambit nga mga human rights organizations sadtong Enero 3, 2019 sa pagkuha unta sang aktwal nga sitwasyon sang mga mangunguma matapos ang natabo nga SEMPO kag Oplan Sauron sang joint forces sang AFP CenCom kag PNP Region 7 sadtong Disyembre 27, 2018 nga nagresulta sang kamatayon sang 6 ka mga inosenteng mangunguma kag habal-habal drivers, ilegal nga pagpang-aresto kag pagpapriso, pagpangransak sang mga kabalayan kag pagpangawat sang mga kwarta kag pagkabutang sang mga pobreng mangunguma.

Mabaskog nga ginahangkat sang LPC ang tanan nga pumuluyo sa Central Negros. Hugot nga maghiliusa. Maghimakas indi mahadlok! Pamatukan ang militarisasyon sakop sa larangan gerilya. Hublasan ang mga pakana sang pasistang AFP kag paslawon ang Oplan Kapayapaan sang US-Duterte nga rehimen!

 

Sabat sang LPC-NPA sa mga Kabutigan ni Col. Igberto Dacoscos sang 62nd IBPA