RCSP Team sang 79th IBPA, Gin-haras sang NPA!

,

Gin-haras sang Bag-ong Hangaway sg Banwa idalum sa Roselyn Jean Pelle Command-Northern Negros Guerilla Front (RJPC-BHB) ang Retooled Community Service Program (RCSP) Team sang 79th IB-PA nga nagkampo sa Sityo Malig-on 2, Barangay Bandila, sa banwa sang Toboso.

Ginhimo ang aksyon militar kontra sa 79th IB-PA bilang sabat sa panawagan sang pamuluyo nga pahalinun ang mga nagkampo lapit sa panimalay nga tropa sang reaksyunaryo nga gubyerno kag nagasabwag sang malain nga mga hinimuan sa lugar sama sa inom, sugal kag prostitusyon.

Ginsabat man gilayon sang RJPC-BHB ang demanda bilang aksyon man sa paghatag hustisya sa pagpatay sang 79th IB-PA kay Ka Ella nga buhi apan samaron panahon ila nadakop sadtong Agosto 20, 2021 sa Silay City kag pagmasaker sa mga hors de combat ukon wala sang ikasarang magbato sanday Ka Monet, Ka Simo, Ka Huawei kag Ka Brod sadtong Setyembre 30, 2021 sa Manapla.

Ginhimo sang mga operatiba sang RJPC-BHB ang pagpangharas sadtong Abril 4, Dominggo, mga 9:50 ang oras sa kagabhion. Bangod sa hugot nga disiplina sa BHB, napaseguro nga wala sang sibilyan nga nasalabat sa maong aksyon.

Ang tropa sa 79th IB-PA nagpundo sa nasambit nga lugar sugod sadtong Enero 2022 hasta una nga semana sang Abril. Madugay na sila nga ginreklamo bangud sa ila pagkampo lapit sa panimalay kag maskin sa panimalay mismo sa mga sibilyan. Natak-an man ang pumuluyo sa pasulit-sulit nila nga pagpatawag sa mga indibidwal nga ginpatihan nagasuporta ukon may kaangtanan sa BHB. Pirme man sila naga-inom, sugal kag nagapa-tari sa erya, kg talamak ang prostitusyon sa nasambit nga kampo.

Liban sini, madugay na ginreklamo sang pumuluyo ang 79th IB-PA sa ila wala kg tuo nga pagpanglapas sa tawhanon nga kinamatarung, sama sa pugos nga pagpasurender, pagransak sa panimalay, pagkastigo, pagtortyur kag pagpatay. Sayun man lang nila ginlapas ang kinamatarong sa mga hors de combat ukon wala sang ikasarang makigbato nga mga hangaway sa RJPC-BHB.

Sa laing higayon, gindis-armahan sang mga operatiba sang RJPC-BHB si Boyet Ayo, pumuluyo sa Sitio Fuentes, Barangay Mabini, sakop sa syudad sang Escalante sadtong Marso 30, 2022, mga alas 8:00 sa kagabhion. Gin-warningan man siya sa iya pagka-intel. Nakuha sang mga operatiba ang 1 ka kalibre .45, 1 ka magasin kag mga bala halin kay Ayo. Madugay na nga ginreklamo sang mga pumuluyo sa nasambit nga lugar ang iya pagpinalupok.

Sa nagkalapit nga katapusan sa termino ni Duterte, ang iya kapareha nga uhaw-sa-dugo nga mga katapo sang AFP kag PNP, ilabe ang 79th IB-PA, nagsige pakadto-pangari nga daw bombero bilang sabat sa mga ila masaligan nga mga report sang ila mga paniktik para malagas ang mga katapo sang BHB kag matuman nila ang ila ilusyon nga mapukan ang rebolusyon kag ang rebolusyonaryo nga pwersa.

Sa kanunay, magapursige kg magpakabakud ang mga rebolusyonaryong pwersa idalum sa RJPC-BHB sa pag-alagad sa pumuluyo.

RCSP Team sang 79th IBPA, Gin-haras sang NPA!
n/a