Rapist, ginsilotan sang NPA sa Escalante City

Karljoe Hidalgo | Deputy Spokesperson | NPA-Northern Negros (Roselyn Pelle Command) | Negros Island Regional Operational Command (Apolinario Gatmaitan Command) | New People's Army
April 19, 2021
Share and help us bring this article to more readers.

Read in: English

Ginpatuman sang mga operatiba sang (RJPC-NPA) ang silot-kamatayon kay Leticio Cordova, 45, residente sang Hacienda Anacer, Brgy. Mabini, Escalante City sining Abril 17, 2021.

Si Cordova ginpahamtangan sang desisyon sang rebolusyonaryong hukmanan sang banwa pagkatapos mapamatud-an sa kasong pagpanglugos ukon rape.

Ang kaso batok ni Cordova una nga ginsang-at sang pamilya sang biktima sa reaksyunaryong gubyerno apang wala sang nahimong aksyon ang mga otoridad. Ginpahug ni Cordova ang pamilya kag ang mismo biktima nga isa ka menor de edad.

Pursigido ang NPA sa pagpatuman sa mga laye sang demokratikong gubyerno sang banwa kag rebolusyonaryong hustisya para sa mga biktima sang mga kriminal ukon malaen nga elemento kag mga kontra-rebolusyonaryo nga ara sa sulod sang sonang gerilya. Ang mga desisyon sa mga kaso nag-agi sa imbestigasyon kag bista sang rebolusyonaryong hukmanan.

Ang rebolusyonaryong hustisya kabaliskaran sang pasistang oryentasyon kag mapintas nga polisiya nga ginapatuman sang rehimeng Duterte. Imbes hatagan sang hustisya ang mga biktima, ginaprotektahan kag ginapahulag sang AFP kag PNP ang mga rapist kag iban pang kriminal para magbulig sa paniktik kag kontra-rebolusyonaryong operasyon.

Amo ang ila ginhimo sa kaso sang rapist kag kawatan nga si Ricky “Paga” Obrique, taga-Sitio Benintigan, Barangay Gawahon, Victorias City. Si Paga isa ka aset nga ginapagiya sang 79th IB sa mga nagliligad kag kasamtangang operasyong kombat sini sa kalasangan.

Ang silot batok ni Cordova indi angay nga ikompara sa asud-asud nga pampulitikang pagpamatay nga ginapatuman sang pasistang rehimen ni Duterte batok sa mga ordinaryong sibilyan. Ang pinakaulihi nga biktima diri sa Negros, si Jesus Passon Jr, isa ka tricycle driver kag membro sang progresibong grupo sang mga imol sa syudad sang Silay.

Ginakondena sang RJPC-NPA ang ini nga tinalawan nga gihu sang death squad ni Duterte.
Ang ini nga kriminal kag teroristang mga akto nga ginamando ni Duterte batok sa mga ordinaryong Pilipino ang kabahin sa mga rason kung ngaa nagadamo subong ang mga unipormadong personel ukon sundalo kag pulis nga nagasikway kay Duterte.

Ginahangkat namon ang mga matuod nga patriyotiko sa ila hanay nga pamatud-an ang ila ginsumpaan sa pagdepensa sa pumuluyo. Sa amon bahin, ang RJPC-NPA nagapabilin nga sinsero nga mga hangaway sang banwa kag alagad sang rebolusyonaryong hustisya.#

Rapist, ginsilotan sang NPA sa Escalante City