Pasiunang pagpatin-aw sa kamatayon ni Ka Oris

Kini nga artikulo adunay hubad sa EnglishPilipino

Himohimo o “trumped up” nga engkwentro ang gipasiatab sa 4ID PA commanding officer nga si Major Gen. Romeo Brawner, nga hinungdan sa pagkamatay ni Ka Oris o Jorge R. Madlos uban sa iyang medical aid. Tinuod nga gipatay sa mga pwersa AFP ug naa na sa kamot sa kaaway ang patay’ng lawas niini, nahitabo kini niadtong Oktubre 29, 2021, sa lungsod sa Impasug-ong, Bukidnon.

Oktubre 29, 2021 sa may alas 8:00 sa gabii, sakay sa motor si Ka Oris ug ang kaubang babaeng medic gikan sa poblacion sa lungsod sa Impasug-ong, Bukidnon padulong sa national highway ug dinhi gibanabanang naatangan ug gipangpatay. Wala sila makaabot sa national highway.

Subay sa report, walay nahitabong banatan, walay airstrike sa bukirong erya sa Impasug-ong ug samot nga walay banatan sa provincial highway niining panahona.

Apan, niadtong Oktubre 31, 2021 sa buntag nagbandilyo na sa mga radio/media si Brawner nga nakuha nila ang patay’ng lawas ni Ka Oris ug nga nakuha nila kini pinaagi sa usa ka dakung engkwentro o banatan nga sinuportahan sa airstrike sa airforce. Naulaw pag-angkon si Brawner nga ila lang giatangan sa provincial highway si Ka Oris uban sa kaubang babaeng medic nga walay mga armas samtang sakay sa usa ka motorsiklo. Walay sinukliay sa mga bala nga nahitabo kay lagi walay dala nga bisan unsa nga armas si Ka Oris sa iyang paggawas sa erya alang sa regular nga medical check-up ug pagpatambal.

Gihagit namo si CO Brawner nga ibutyag niya sa media ug sa publiko ang tinuod nga hitabo, aron dili siya mahimong dakung bakakon ug tinuod nga angay niyang ipasigarbo ang iyang giangkon nga kadaugan sa pagpatay ni Ka Oris. Tinuod ang gubat/gera may lainlaing arte aron makab-ot lang ang tumong o proyekto alang sa pagkuha sa patay’ng lawas, ilabina sa proyekto sa berdugong US Duterte/AFP/PNP/NTF-ELCAC alang kang Ka. Oris ug uban pang mga kadre sa rebolusyon. Para sa mga kontra-rebolusyonaryong US Duterte/AFP/PNP kabahin na sa ilang pamaagi ang pagpamakak aron lang ipakita nga maayo sila sa banatan o mga sangka. Tinuod napamaayo nila ang ilang pagpaniktik sa pagbyahi ni Ka Oris, apan anaa sa kahimtang nga walay ikasukol si Ka Oris apan ilang gipatay, nga dili angay buhaton sa mga pwersa sa AFP/PNP nga matod nila may gisunod nga “rules of engagement” o mga balaod sa sangka isip mga regular nga pwersa sa usa ka nagtunhay nga goberno.

Alang sa taga-media ug uban pang mga kaila ni Ka Oris kini lang usa ang pasiunang report sa nahitabong kamatayon niya.

Manghinaut ako/kami nga dili unta babagan/baldahon sa gobernong Duterte/AFP/PNP ang paghaya kang Ka Oris aron nga sa katapusang higayon mabisita siya sa tanan nakaila kaniya.

Pasiunang pagpatin-aw sa kamatayon ni Ka Oris
n/a