Panginto kag Pagpanghalit: Tinalawan nga Pamaagi sang 303rd Brigade

Ang artikulo nga ini may salhin sa EnglishPilipino

Para hinabunan ang kapaslawan sang militar sa ila dalagkuan nga operasyon nga laban kusog batalyon agud wasakon ang rebolusyonaryo nga pwersa, nagahimo ini sang mga pagpanghalit sa hanay sang pumuluyo pareho sang makasiligni nga pagpamatay, iligal nga pag-aresto, abduction, tortyur, pagpamahug ilabina sa ila mga gina-alegar nga pamilya sang mga rebolusyonaryo, pagpangawat sa mga kasapatan kag pagguba sa palangabuhi-an sang mga mangunguma. Nangin patakaran na sang mga pwersa sang estado nga ideklara nga engkwentro ang ila mga “crime scene,” pasibangdan nga katapu sang NPA ang ila mga biktima kag butang-butangan pa sang mataas nga ranggo, kag tanuman sang armas.

Sini lang nga bulan sang Hulyo, apat ka peke nga engkwentro sa norte kag sentral nga bahin sang Negros ang ginpabugal sang berdugo nga 303rd Brigade commander BGen. Inocencio Pasaporte: una sang Hulyo 6, 2022, apat ka katapu sang NPA ang nagamasakit sang trangkaso ang nadakop sang tropa sang 94th IB sa Sityo Calunakon, Barangay Santol, Binalbagan, Negros Occidental. Matapos nga madakop, gindala sila sa Sityo Amiles kag didto gin-masaker nga wala na sang ikasarang mag-away o hors de combat. Ginpaggwa sang militar nga lihitimo nga engkwentro nga naglawig lang sa tatlo ka minuto.

Ikaduha, sa pareho nga petsa, ginpa-arakan sang 40 ka elemento sang 79th IB ang mga residente sang Sitio Banwa Minatay, Barangay Marcelo, Calatrava, Negros Occidental. Ginpa-arakan man ang kalasangan kag ang balay nga lapit sini. Napilasan ang isa ka bata, na-trauma ang eloy kag iban nga myembro sang pamilya, kag iligal nga gin-aresto base sa planted nga ebidensya ang isa ka sibilyan.

Ikatulo, Hulyo 20, 2022, samtang nagapahuway ang lima ka mangunguma sa isa ka kamalig sa Sityo Catuptop, Barangay Trinidad, Guihulngan City, Negros Oriental, ginpa-arakan ini sang luthang sang mga katapu sang 62nd IB. Sa sini nga insidente, napatay si Pompeo Landisa, residente sang sini nga lugar. Simple lang nga pahayag sang militar nga isa ka engkwentro ang natabu kag ang napatay isa ka NPA. Si Pompeo Landisa isa ka mangunguma kag tumandok sang sini nga lugar, halos tanan nga pumuluyo sa ila sityo nakakilala sa iya kag klaro nga isa siya ka sibilyan.

Ikaapat, Hulyo 26, 2022, nagakatulog pa sang mga alas singko sang kaagahon sang ginpa-arakan sang mga katapu sang 62nd IB ang isa ka balay sa Sityo Banderahan, Barangay Trinidad, Guihulngan City, Negros Oriental. Napatay sa sini nga pagmasaker sanday Christina Jacolbe nga nagabusong sang lima ka bulan, ang iya anak nga si Everly Kee Jacolbe, 16 anyos kag Rodan Montero. Si Christina isa ka anay maestra sa Day Care kag target nga patyon sang militar halin pa sa ginlunsar ang Oplan Sauron 1 sa syudad sang Guihulngan kag iban nga banwa sang Negros Oriental.

Magluwas sa pagpamatay sang mga sibilyan kag wala sang inogbato, madata man ang iligal nga pagpang-aresto sang mga sibilyan pareho sang mag-asawa nga Gerald Ganti kag Dalen Alipo-on sang syudad sang Himamaylan, ang gina-aligar nga pagkadakop sang isa ka most wanted sa Central Visayas nga si Charlie Saliganan sa Sta. Catalina,Negros Oriental nga ginbasibangdan nga katapo sang NPA, kag ang iligal nga pag-aresto kay Ramonito Mahinay sang Vallehermoso, Negros Oriental. May ara man tuyo nga pag-kidnap sang mga kabataan sang Debagyo kag Mijares nga gina-aligar kabataan sang NPA agud pwersahon ang ginikanan nga magsurender.

Ini nga mga panghitabo nagapamatuod nga kahalitan ang dala sa kontrarebolusyonaryo nga kampanya sang 3rd ID sa isla sang Negros. Gina-igo ang mga inosente nga sibilyan ukon ang mga kaupod nga wala na sa ikasarang nga magbato. Isa ini ka tinalawan nga pamaagi nga ginakangil-aran sang pumuluyo.

Ang asud-asud nga himo-himo nga “fake encounter” sang pasista nga AFP nagapamatu-od nga ang rehimen US-Marcos Jr isa lang ka pagpadayon sa pag-atake kag pagpamahog sa pumuluyo kag sa ila mga kinamatarung sa tunga sang grabe nga krisis sosyo-ekonomiko. Pareho lang nga ginatulod ang pumuluyo nga makigbahin sa armadong paghimakas para sa matuod nga kahilwayan.

Nagadalum na ang lulubngan sang mala-kolonyal kag mala-pyudal nga sistema nga ginakutkot sang rehimen US-Marcos Jr. Ang pumuluyo ang mangin makahulusga sa katapusan sang rehimen upod ang ila matuod nga hangaway.###

Panginto kag Pagpanghalit: Tinalawan nga Pamaagi sang 303rd Brigade
n/a