Pagparada kay “Sargent/Angel” nga inosenteng mangunguma kag pamatan-on bilang peke nga NPA, gingamit sang mga matag-as nga opisyal sang AFP para sa promosyon kag agud maka-kwarta

Dionesio Magbuelas | Spokesperson | NPA-South Central Negros (Mt. Cansermon Command) | Negros Island Regional Operational Command (Apolinario Gatmaitan Command) | New People's Army
January 25, 2021
Share and help us bring this article to more readers.

Isa ka kabutigan kag tinikal ang ginpaggwa nga pahayag kag pagpresentar sa 16th Scout Ranger Company nga ginapamunuan ni Capt. Roldan Pangilinan kag ni Col. Leonardo Peña kumander sang 302nd Brgde. PA sa isa ka “Sargent/Angel” ukon Jerryd Gargoles sa tuod nga pangalan, 21 anyos, nga kuno katapo sang NPA kag nagsurender sadtong Enero 8, 2021 sa Brgy. Carabalan, Himamaylan City.

Base sa pagpangusisa sang MCC-NPA, si Jerryd Gargoles isa ka lumad nga taga Sityo Lunoy, Brgy. Carabalan, Himamaylan City kag isa lamang ka inosenteng mangunguma. Sadtong Nobyembre 26, 2020 ginsaka ang ila balay kag ginpahug sang mga katapo sang 16th SRC si Jerryd kag ang iya amay nga si Jared Gargoles kag ginpilit nga pasurenderon para pa ako-on nga katapo sang NPA.

Si Jared isa sa mga ginainitan upod sa 10 pa nga ginapasakaan sang himo-himo nga kaso angot sa natabo nga enkwentero sa Sityo Camuag sa amo nga barangay. Madula lamang sila sa listahan sang mga dalakpon kon sila magsurender. Makapila ka beses na nga ginakadtu-an ang mag-amay sa mga katapu sang RCSP nga nagatinir sa ila lugar upod ang pila ka elemento sang 16th SRC. Bangud sa grabe nga kahadlok para sa ila kabuhi napilitan ang mag-amay nga magkadto sa baryo para sa pagklaro sa ila mga ngalan. Baliskad sa ginawakal kag ginatikal ni Col. Peña, nga kuno NPA si Jerryd kag nagsurender sa ila.

Amo man ini ang natabu sa mga mangunguma sa Brgy. Buenavista nga sanday alyas Rambo ukon Apyot Hilacio, Kim ukon Ontoy Torres, certain Renie kag Jeric Morales nga ginpresentar nga kuno mga katapu sang NPA sa gintigayon nga seremonya sang mga militar sa Sityo Ece,Brgy. Tan-awan sadtong bulan sang Nobyembre 2020. Para mas mapatihan ang ila propaganda ginatudlu-an kag ginapilit ang mga pamatan-on nga maghatag sang testimonya sa publiko. May mga insidente pa gani nga ang iban sa ila wala na makahambal sa atubang indi bangud sa kakulba kundi bangud nalipat sa “script” nga gintudlo sang militar sa ila.

Indi ini bag-o nga mga taktika kag modus sang AFP kag PNP paagi sa ila Task Force- ELCAC pagkatapos maggwa ang MO.32 kag EO.70 sang rehimeng Duterte. Paagi sa ila mga bugos nga programa kaangay sang E-CLIP, ginatarget, pwersahan nga ginpangdakop kag ginatanuman sang ebidensya ang mga sibilyan kaangay sa natabu sa mga mangunguma nga sila Joeniffer Hermino kag Glen de Baguio sa Brgy. Buenavista sadtong Nobyembre 2020. Pilit nga ginpasurender kag ginpaako nga NPA kag ginpresentar ang mga armas kag eksplosibo nga halin man lang gihapon sa arsenal ukon armory sang AFP-PNP. Ginapamahug nga may matabu sa ila kabuhi kag pamilya kag ginatiplang paagi sa pagpatawag sang meeting, pagpanguha sang ila litrato kag pagpapirma sa kuno attendance sheet kag ginapaggwa ang ginatos tubtob linibo ka kuno mga surrenderees. Ini indi lang para sa propaganda nga katuyuan kundi ang paglagas sa mga opisyal sang AFP-PNP sa promosyon kag kwarta bangud ang tagsa ka magsurender may mabaton nga ₱50,000 bilang livelihood assistance. Sa masami, wala ini ginahatag sang mga opisyal sang AFP/PNP kag nagakadto lang ini sa ila bulsa.

Bisan sa senado kag kongreso may mga duda na sa kadako sang budget nga gina-alokar para sa NTF-ELCAC. Sa subong nga tuig nagalab-ot sa 19 bilyon para lang sa operasyon sa NTF-ELCAC nga segurado nga ang daku nga bahin sini magakadto lang sa bulsa sang mga matag-as nga opisyal sang AFP kag PNP.

Naglab-ot na sa 19 ka kaso ang narekord sang MCC-NPA sa iligal nga pagpang-aresto kag detensyon sa mga sibilyan sa sakop sang Himamaylan sa sulod lamang sang 2019-2020 kag 13 diri ara pa gihapon sa prisohan.

Samtang nagakinaran-karan kag nagapalumba ang mga opisyal sang AFP-PNP para sa promosyon kag daku nga mabulsa halin sa 19 bilyon nga pundo segurado naman nga nagakumod ang ila hanay sa madulum bangud sang wala untat ang ila operasyon militar sa kabukiran bisan panahon sa paskwa kag bag-ong tuig. Naga-atubang sa kadelikadohan ang ila tropa sa kabukiran sa pagpangita sa NPA samtang nagapatawhay ang ila mga matag-as nga opisyal sa ila kampo kag opisina.

Indi lamang ang masang nagahimakas ang magapuno sa kadalanan sa pala-abuton kundi pati na ang mga mamuklat nga tropa sa ila hanay bangud sa korapsyon sa hanay sang militar kag kagaruk sa sistema sang reaksyonaryo nga rehimen.###

Pagparada kay “Sargent/Angel” nga inosenteng mangunguma kag pamatan-on bilang peke nga NPA, gingamit sang mga matag-as nga opisyal sang AFP para sa promosyon kag agud maka-kwarta