Pagpangulata ug pagpatay og mga sibilyan, balos sa 37th IB human makahiagom og kapildihan batuk sa NPA sa Sultan Kudarat

Gary Angeles | Spokesperson | Far South Mindanao Regional Operational Command (Valentin Palamine Command) | New People's Army
September 25, 2020
Share and help us bring this article to more readers.

[UPDATED: 10/04/20] Sagunson nga mga kapildihan ang nahiagoman sa 37th IB sa pila ka mga panagsangka batuk sa New People’s Army gikan bulan sa Hulyo hangtud Setyembre karong tuiga. Ikaduhang semana nagsugod ang operasyong militar sa Palimbang, Kalamansig ug Senator Ninoy Aquino sa Sultan Kudarat ug nagapadayon pa hangtud sa kasamtangan.

Niadtong Hulyo 26, nagkaengkwentro ang tropa sa 37th IB ug usa ka iskwad sa NPA sa Brgy. Baluan, Palimbang, Sultan Kudarat. Dili moubos sa 3 ang napatay sa tropa sa militar samtang usa ka membro sa NPA ang namartir.

Niadtong Agosto 17, gipabuthan og command-detonated explosive sa usa tim sa NPA ang usa ka 6×6 truck sa 37th IB sa Sitio Paril, Brgy. Sta.Clara. Tulo ka elemento sa 37th IB ang namatay ug usa ang samaron sa maong operasyon.

Niadtong Setyembre 2, banda alas 11:25 sa buntag, giparalisa sa usa ka iskwad sa NPA ang operasyon sa Abu-Gemma Construction sa Sitio Welcome, Brgy Datu Ito Andong sa lungsod sa Kalamansig tungod sa mga proyekto niini nga paghimo ug pagpalapad sa dalan alang sa magun-obon sa kinaiyahan nga logging operation sa mga Consunji sa unang distrito sa Sultan Kudarat. Usa ka backhoe ang nadaut sa maong operasyong punitibo. Human niini banda alas 12:10 sa udto, giambus gamit ang 4 ka mga command-detonated explosives, sa usa ka iskwad sa NPA ang tropa sa 37th IB sa Sitio Lower Nursery, Brgy. Sta,Clara. Nagsakay sa duha ka 6×6 military truck ang tropa sa 37th IB nga nagpahigayon og operasyong hot-pursuit uban ang kapulisan. Sa maong panagsangka, matud pa sa mga nakakitang sibilyan, 24 ka mga elemento sa 37th IB ang namatay, 28 ang samaron samtang naguba ang 1 ka 6×6 nga military truck.

Human sa maong panghitabo, gisirad-an dayon sa militar ang dalan sa nahitaboan sulod sa duha ka adlaw. Gikulata sa militar ang 3 ka mga sibilyan nga nakaagi sa nahitaboan nga sila Renato Angulin, Jun-jun Mandong ug Cris Macargasi motorista nga nakaagi sa nahitaboan. Ug niadtong Setyembre 4 sa gabii, gipatay sa mga tropa sa 37th IB ang duha ka sibilyan nga sila Dino Itnu ug Renato Macargas ng nanulo lang og baki sa Sitio Loboc, Brgy. Sta.Clara.

Gipanghambog sa 6th ID (kung asa napailalom ang 37th IB) pinaagi sa Commanding Officer niini nga si Maj.Gen. Diosdado Carreon nga mga NPA ang duha ka namatay ug dunay engkwentro nga nahitabo. Apan ang kamatuoran , walay engkwentrong nahitabo ug mga sibilyan ang gipatay sa iyang mga sakop. Gani, giareglo nila ang kaso pinaagi sa municipal IPMR sa Kalamansig nga si Eddie Gogo. Naghatag og Php 60,000 ang 37th IB og aron dili na magkaso ang pamilya sa mga biktima. Apan kini direktang pag-angkon lang nga walay duda nga sila ang nakahimo og krimen.

Dugang pa, nag-usik-usik lang og minillyong kwarta sa katawhan ang 6th ID sa ginapahigayong operasyong militar niini. Nakapabuto na kini sa dili moubos sa 7 ka higayon sa kanyon nga Howitzer 105 ug dili moubos sa Php 201, 978 ang giusikan tungod kay naa sa Php28, 854 ang kantidad sa matag bala niini. Dili moubos usab sa Php4.7 milyon ang gasto sa dili sa 5 ka beses (2 ka oras matag lupad) nga paglupad sa spy plane niini tungod kay gibana-bana nga Php470,000 ang magastos sa matag lupad niini, dugang pa dinhi ang Php336,150 ng gasto sa pagpalupad og helicopter sa.3 ka higayon sa average nga 1 ka oras matag lupad nga kasagaran maghatod lang sa ilang mga opisyal. Samtang mokabat usab sa Php61,119,194 ang gasto sa pagkaon, suholan, mobility, hazard pay ugbp sa kapin-kon kulang 300 ka personaheng gimobilisa niini gikan sa 7th IB ug 37th IB sulod sa 52 ka adlaw, gikan sa July 6 hangtud sa kasamtangan.

Samtang gigutom ug naglisod ang katawhan tungod sa pandemyang COVID19 walay kukaulaw ang militar ug administrasyong Duterte nga usikan ug kurakoton ang kwarta sa katawhan pinaagi sa walay-kapadulngan apan gastosong operasyong militar ug korapsyon sa mga institusyong panglawas sama sa Philhealth ug DOH, inay nga gastohon kini alang sa serbisyong panglawas ug hinabang sa katawhan.

Pagpangulata ug pagpatay og mga sibilyan, balos sa 37th IB human makahiagom og kapildihan batuk sa NPA sa Sultan Kudarat