Mga bokal gipasidunggan sa paghatag prayoridad sa panglawas katawhan kaysa pundo sa intelligence

Estrella Banagbanag | Spokesperson | NPA-Southeast Negros (Rachelle Mae Palang Command) | Negros Island Regional Operational Command (Apolinario Gatmaitan Command) | New People's Army
February 13, 2021
Share and help us bring this article to more readers.

Read in: English

Nakigduyog ang Rachelle Mae Palang Command (RPMC) ug tibuok rebolusyonaryong kalihukan sa katawhang Negrosanon sa pagpasidungog sa mga sakop sa Hunta Probinsyal sa Negros Oriental sa gihimong desisyon niini nga dakong paglaslas sa badget nga gigahin alang sa gitawag nga “intelligence gathering fund” aron mahatagan sa dugang rekurso ang mga lakang sa pag-atubang sa COVID-19.

Ang Hunta Probinsyal sa ilang pinaka-ulahing panagtigom miaprobar sa pagkunhod sa maong budget gikan 11 milyones ngadto nalang sa usa ka milyon. Niini nga panahon sa pandemya ug hilabihan ka lisod nga ekonomikanhong sitwasyon, angayan lang nga hatagan sa prayoridad ang panglawas ug ubang batakang serbisyo.

Ang wala kinahanglanang gasto sama sa kadudahan ug dili masubay nga sikreto nga pundo kinahanglang tangtangon. Usa pa, dakong bahin sa maong pundo maadto lang sa bulsa sa mga kadagkuan sa militar ug gigamit sa pagpaniid ug pag-surbeylans sa mga gi-red tag nga indibidwal.

Bisan pa man nga kini nga kantidad dili kaayo dako aron ipatuman ang kuyanap nga epekto sa mga paningkamot batok sa COVID-19 sa probinsya, kini nga lakang naghatag sa maayong sumbanan hisgutanan sa tukmang pagprayoridad sa badget ug paghimo sa independente nga desisyon aron maglatid sa palisiya. Bisan pa man sa pagpangibabaw sa militar sa mga lakang pag-atubang sa pandemya ug mismo sa tibuok sibilyan nga burukrasya pinaagi sa NTF-ELCAC.

Nakadayeg kami sa kaisog sa mga sakop sa Hunta Probinsyal sa pagbarug kung unsa ang tukma subay sa ilang kabubut-on ug lawom nga konsiderasyon sa sitwasyon.

Aron paghatag rason sa ilang gamay nga “pork barrel”, ang Kumander sa 302nd Brigade nga si Col. Leonardo Peña nagtagawtaw mahitungod sa “panginahanglan sa badget sa pagpangalap sa impormasyon” aron suportahan ang mosyon ni PNP Provincial Director Col. Bryant Demot sa pagpabilin sa gilaslas nga alokasyon sa panagtigom sa Provincial Peace and Order (PPOC) niadtong Pebrero 9.

Midugang siya sa pag-ingon nga, “lisod mokuha og mga assets nga imo lang sugoon apan wala kay mahatag nga iyang magamit.”

Dili ba nangangkon ang militar nga sila ang anaa sa bentaha sa awayan sa kasing-kasing ug huna-huna sa katawhan pinaagi sa ilang malinglahon nga Retooled Community Support Program (RCSP)? Dili ba diay sila makakuha sa impormasyon kung walay binayran nga mga asset o informant kung tinuod pa nga anaa kanila ang suporta sa katawhan?

Sa maong panagtigom sa PPOC miluwat og mga magkasumpaki nga pahayag si Peña kabahin sa kusog sa NPA ug sa panginahanglang alang sa pundo sa paniktik. Walay klaro nga giangkon niya nga “migamay ang ihap sa mga rebelde” apan “wala nagpasabot nga mohunong na ang pagpangalap sa impormasyon.” Kung gamay ra ang hulga, nganong kinahanglan ang milyones alang sa paniktik?

Dugang pa, gisumpaki niya ang iyang kaugalingon sa pag-ingon nga ang ihap sa mga manggugubat sa NPA sa erya sa 302nd Brigade mokabat sa 300 nga mas dako sa naunang banabana sa militar, labi na sa pag-angkon niini nga “nagdugmok” na ang larangan sa Southeast Negros niadtong Nobyembre miaging tuig. Sa pagkatinuod, wala tuyoa nga giangkon ni Peña nga mitubo ang kusog sa NPA. Kini nga numero ang kanhi gigamit sa militar sa paghulagway sa kusog sa NPA sa tibuok sa Isla sa Negros.

Pinasikad sa tin-aw nga sukaranan, gisupak ni Board Member Erwin Macias ang mosyon ni Demot ug gipatin-aw ang panginahanglan sa paglaslas sa pundo sa paniktik. Iyang gipaklaro nga ubos sa kasamtangang sirkumstansya mas gipili sa Hunta Probinsyal nga hatagan prayoridad ang sektor sa panglawas ug ingon man ang pagpaluag sa kahuot sa probinsyal nga tambalanan ug pagpalambo sa iyang mga pasilidad.

Ang bokal midugang nga sobra usa ka milyon ang gipanghatag sa matag pito ka health center sa mga primaryang tambalanan sa Bindoy, Bayawan City, Bais City ug Guihulngan City aron mapalambo ang ilang serbisyo.

Kini nga panghitabo nagpakita nga dili ang tanang mga opisyal sa lokal nga pangagamhanan uyon-uyon lang ug buta nga tigsunod sa pasistang rehimeng US-Duterte ug iyang pwersang militar.

Nanawagan ang RMPC sa tanang bokal sa pagpanalipod sa ilang independensya ug ipadayon ang paghatag sa mga mabulukong serbisyo sa katawhang Negrosanon pinaagi sa mga mapuslanong balaudnon ug ubang mga pamaagi. ###

Mga bokal gipasidunggan sa paghatag prayoridad sa panglawas katawhan kaysa pundo sa intelligence