Labanan ken Lappedan ti Anti-Terrorism Act 2020, ti Terorismo ti Estado a Kontra Umili

Rev. Fr. Neo Padre Aglipay | Spokesperson | Christians for National Liberation-Northern Luzon | National Democratic Front of the Philippines
August 10, 2020
Share and help us bring this article to more readers.

Asikayo pay, dakayo nga agaramid ti linteg a mangparigat kadagiti tattaok. Kasta ti pamuspusanyo tapno saan a magun-od dagiti napanglaw ti kalinteganda ket dida matunton ti hustisya.Isaias 10:1-2

Ti anag ti Anti-Terror Law (ATL) Republic Act No. 11479 wenno Anti-Terrorism Act 2020, ket terrorismo ti estado iti narruay nga umili. Daytoy ket kontra umili, nagulib, narungsot ken manangallilaw a linteg, linteg a mangikkat ti wayawaya ken demokrasya iti intar tayo. Maikaniwas daytoy iti konstitusyon ti Pilipinas (1987) ken agserbi laeng kadagiti agar-ari a dasig ken among da nga imperyalista nga Estados Unidos ken Tsina. Kayatda a pagulimeken ti umili a lumablaban ken uray dagiti oposisyon ti agdama a rehimen. Kasta met a mangted daytoy ti mandato wenno ligal a parupa kadagiti pulis ken militar nga agisayangkat ti kinadursok ken kinadamsak kontra kadagiti umili a mangilablaban kadagiti karbengan da a kas tao. Kasta met a maikaniwas daytoy kadagiti adal ken sursuro a nakristiyanuan, ti pangsalluad ken pangilaban kadagiti marigrigat, maidaddadanes ken magungundawayan, dagiti kakaasi a kakabsat ni Kristo.

Ti nangnangruna a linaon daytoy a linteg ket mangbutbuteng kadagiti umili tapno agulimek ken saan da nga agisayangkat ti panagtignay kontra kadagiti madi nga aramid ti rehimen a Duterte. Kasta met a makaulaw wenno mabalin a pusipusen ti pannakaipataros dagiti linaon na pabor kadagiti kontra umili nga adda iti poder. adda dita ti saan a nalawag a depinisyon no siasino wenno ania ti terorismo. Dakkel nga amang a maabuso daytoy. Uray ti panangeddeng no siasino ti terorista ket saan a magna ti husto a proseso wenno iti husgado, mabalin nga idektar ni Duterte wenno ti Anti Terrorism Council (ATC) no siasino ti terorista. Mabalin a makulong ti siaasino man nga itudoda a terorista iti unos ti 14 inggana 24 nga aldaw nga awan ti “warrant of arrest” ken kaso a naisampa kenkuana, mabalin met laeng a tinglen wenno alaen amin a sanikua dagiti mapagsuspetsaan, ken mabalin a maiyaramid ti surbelans kaniana (wire tapped etc). Ikkanna ti ATC, babaen iti diktar ni Duterte ti dakkel a turay ti maited iti ATC, a mabalin nga agitudo no siaasino ti terorista, kas kadagiti aktibista, oposisyonista a mangtubtubngar kadagiti madi nga aramid ken polisiya ti rehimen a Duterte, uray no awan ti mandato manipud iti korte. Dagiti nangnangruna a maapektaran iti daytoy ket dagiti narruay nga umili kas kadagiti lider ti mangmangged, mannalon, nakurapay nga umiliiti syudad (urban poor), naillian a minorya ken dagiti propesyunal a mangitantandudo ti pannakailaban ti karbengen tao kas kadagiti abogado, mannurat, mangisursuro ken uray iti intar dagiti trabahador dagiti Iglesiyas ket saan da a mailaksid.

Iti kapadasan tayo ditoy North Luzon adda 3 a padi ti Romano Katoliko a pinatay da nga inggana ita ket awan ti resulta ti imbistigasyon. Dagitoy a papadi ket aktiboda a tumultulong ken sumupsuporta kadagiti laban ti narruay nga umili nangnangruna iti intar dagiti mannalon. Adu ti naiyaramidan ti parparbo a kaso a papastor wenno trabahador dagiti Iglesiya, kasta met adu dagiti na “red tagged”, nasurbelans ken butbutngen da manipud kadagiti nadumaduma a denominasyon kas iti UCCP, IFI, UMC, RC ken uray evangelical pastors. Uray dagiti Obispo ti UCCP, IFI ken RC ket karamanda kadagiti mapadpadakes “Red tagged” kadagiti “social media” ken nangisit a propaganda dagiti militar. Isu a mamati tayo a babaen iti daytoy a linteg kumaro ti agbalin a kinadamsak dagiti militar ken pulis gapuna ta addan lisensya da.

Imbes nga ipangpangruna koma ti rehimen a Duterte ti panangsango iti Covid 19 a pandemya daytoy met pannakaipasa ti ATL, pannakaiserra ti ABS-CBN, panangiduron iti cha cha, ken militarisasyon iti kaaw-awayan ti ipangpangruna na nga ar-aramiden. Awan ti nalawag a plano tapno maatipa ti pandemya a Covid 19. Palpak ti panangsango na gapu ta imbes a propesyunal manipud iti sektor ti salun-at iti ikabil a mangsango, puro militar met dagiti impatugawna ken estilo militar ti solusyon nga impakatda. Kasta met a nausar ti pandemya a kalub wenno tabing ti pasismo ken militarisasyon uray kadagiti sentro ti ili ken syudad. Kasta met a nakaro a korupsyon ti intay naimatangan iti gistay amin nga ahensya a nakapakat para iti daytoy a pandemya, kas iti pannakaipatungpal ti pannakaiwaras ti SAP, panaggatang ti PPE, “vintallation machines” ken dadduma pay nga usar. Korapsyon ti pondo manipud philhealth a para kadagiti pasyente koma ket napan kadagiti ima dagiti alipures ni Duterte, uray kadagiti pannakatarimaan dagiti “quarantine centers” ket nakupo/nasolo dagiti alipures ni Duterte. Dakkel unay ti utang tayo iti ruar ti pagilian nga umabot ti P9 trillion, ngem saan a nalawag no ania ken sadino ti nakaiyusaran na.

Kas pasurot ni Kristo aramidentayo met ti inaramid na idi, iti saklang dagiti agtururay iti panawen na kinondenar na kadagiti panagabuso, pananggundaway ken pannakaidadanes dagiti nakurapay. Imbati na daytoy a trabaho kadagiti disipulona ket masapul nga agtultuloy tayo a mangilaban ti hustisya ken kinapudno. No nadusa wenno napapatay dagiti immuna a kristiayano gapu iti daytoy a misyon masapul a sisasagana tayo met ita, ta intay ituloy nga aramiden uray no narisgo daytoy, biag man ti intay idaton. “ ti siasino a mapukaw na ti biag na gapu kaniak ket agbiag nga agnanayon” Isu nga intayo aramiden ti batang tayo, awan ti lugar ti panagulimek ken saan a pannakibiang. Datayo ti nakaitalkan ti sangaparsuaan, intayo ngarud makigamulo ket ilaban ken biroken ti pudno a wayawaya ken hustisya. Labanan ken lappedan ti pannakaimplementar ti Anti-Terrorism Act 2020 iti amin a pamuspusan, ligal ken illigal, nalimed ken naparang, armado ken saan nga armado. Dawaten tayo ngarud iti nalawa nga umili a makipagkaykaysa tayo kadagiti timpuyog a lumablaban tapno mangged ti boses tayo ket maipakita ti kinakristiyano babaen ti panglaban iti daytoy a tiraniko, pasista ken mamamatay tao a rehimen a Duterte.

Ibasura ti Terror Law ni Duterte!
Patakyasin ti rehimen a US-Duterte!

Labanan ken Lappedan ti Anti-Terrorism Act 2020, ti Terorismo ti Estado a Kontra Umili