Kriminal kag sindikato nga RPA-ABB gin-ambus sang NPA

Julio Montana | Spokesperson | Panay Regional Operational Command | New People's Army
January 20, 2020
Share and help us bring this article to more readers.

 

Ginapanginbulahan sang Coronacion “Waling-Waling” Chiva Command, Rehiyunal nga Kumand sa Operasyon, New People’s Army-Panay ang magkasunod nga madinalag-on nga taktikal nga opensiba nga ginlunsar sang mga yunit sini batuk sa Revolutionary Proletarian Army-Alex Boncayao Brigade (RPA-ABB) sa diin, nagsuprir ining lagawan nga rebeldeng tropa sang 6 ka killed in action kag indi magnubo sa 5 ka wounded in action.

Kon madumduman, una nga gin-ambus sang yunit sang Mount Napulac Command ang tropa sang RPA-ABB nga ginapamunuan ni Rammy Cataluña sa Brgy. Camia, San Joaquin, Iloilo alas 5:30 sang hapon sadtong Enero 12 samtang nagapauli ang mga ini halin sa kapyestahan. Tatlo ka adlaw lang makalipas, gin-ambus man sang yunit sang Napoleon Tumagtang Command ang mas o menus isa ka platun sang RPA-ABB nga ginapamunuan nanday Jojo Camino kag Gene Maido. Nagapakadto sa kapyestahan sang Brgy. Cunsad, Alimodian, Iloilo sadtong aga sang Enero 15, 2020 sang ginbanatan sila sang mga Pulang Hukbo.

Sandig sa masaligan nga impormasyon sang NPA nakilala sa 6 nga napatay amo sanday Rammy Cataluña sang Danao, Janiuay, PJ Castiva, alyas Panoy nga taga-Bangko, Alimodian kag isa nga naga-apelyido Amoyo. Ini baliskad sa binutig nga ginpahayag ni Major Pancito, spokesperson sang 3rd Infantry Division Philippine Army nga wala sang kaswalti sa RPA-ABB.

Ining aksyon militar ginpatuman sang NPA bilang sabat sa mabaskog nga demanda sang malapad nga pumuluyo nga silutan ining kriminal, abusador, sindikato nga grupo nga suportado sang AFP kag sang Rehimeng Duterte. Maathag nga gin-ako ni Pancito nga ini sila ginakabig nga espesyal CAFGU kag nagabaton sang alawans halin sa ila gubyerno. Sang Oktubre 2019 nag-abot gid si Duterte sa Camp Peralta, Jamindan agud saksihan ang pagbalik sa sabak sang iya gobyerno sang 300 ka tropa sang RPA. Maathag man nga ginhambal sang rehimen nga igapaidalom sila sa paghanas para himuon nga auxillary force.

Ginakunsente kag ginasagod sang AFP ining kriminal kag sindikato nga grupo sa pihak sang ila malaba na nga listahan sang pagpamatay, pagpanghold-ap, pagpangilkil, pagpanakit sa pumuluyo. Inutil ang rehimen nga mapasabat sila sa ila mga krimen sa pumuluyo kag mahatag ang hustisya sa ila mga biktima. Sa baylo gin-ligalisa pa ang ila pagluntad paagi sa paghimo sa ila nga espesyal CAFGU.

Pila sang mga krimen nga ila na-komiter amo ang mga masunod:

-Pagpatay kay Joe Calapardo sang Buga, Leon, Iloilo sang 2006

-Paghold-ap, pagpatay kag sekreto nga paglubong sang isa ka babaye nga retired teacher nga taga-Jaro sang 2014

-Pagpatay kakunsabo ang “dirty tricks department” sang AFP kay Romeo Capalla, manedyer sang isa ka eksport bisnis sa tindahan sang Oton sang Marso 15, 2014.

-Pagpatay kay Dionisio Garete sang Dabong, Janiuay sang 2014.

-Pagpatay kay Isik Calseña, isa ka mangunguma sang Seol Norte, Leon, Iloilo sang 2016. Si Calseña bag-o lang nakagwa sa hospital sang gintiro sa uringan.

-Pagpatay kay Rodgie Aliparo sang Brgy. Bagacay, Tigbauan. Ginpatay siya sa Brgy. Salngan, Oton sang 2016

-Pagpatay sang isa ka brgy. opisyal nga naga-apelyido Tubungbanua sang Brgy. Dorong-an, Tigbauan sang 2016

-Pagpatay kay Alex Torre sang Brgy. Lanag Tigbauan. Ginpatay siya sa Brgy. Guisian, Tigbauan sang 2017

-Pagkastigo sa isa ka manunudlo sa Bad-as San Joaquin National High School

-Pagpatay kay Konsehal Amatorio sang Sipitan, Tigbauan, Iloilo sang 2019; si Castiva isa sang na-identify nga may salabton sa pagpatay sa nasambit nga konsehal

Nagapanawagan kami sa malapad nga masa nga makigbahin sa kahublagan sa pagbungkag sining kriminal kag sindikato nga RPA-ABB. Lab-uton nga mapaathagan ang inyo myembro sang pamilya nga ginaganoy nila sa ila mga aktibidad. Kumbinsihon sila nga maggwa sa nasambit nga grupo. Mangisog nga ibuyagyag ang malaba nga listahan sang ila mga krimen. Pamatukan ang pagtolerar kag pag-inakop sa ila sang pasistang rehimeng Duterte sa tabon sang paghimo sa ila bilang Espesyal CAFGU.

Kriminal kag sindikato nga RPA-ABB gin-ambus sang NPA