Press Release Hustisya ang saad sa PKP, BHB alang sa mga gipatay nga mga magtutudlo sa Lumad ug kaubanan

,
Kini nga artikulo adunay hubad sa English

Nagsaad karong adlawa ang Partido Komunista ng Pilipinas (PKP) ug ang New People’s Army Southern Mindanao Regional Operational Command nga pagasilutan ang mga sad-an sa pagmasaker sa mga magtutudlo sa Lumad nga sila Chad Booc ug Gelejurain Ngujo II, community health worker nga si Elgyn Balonga, ug duha pa ka kauban niadtong Pebrero 24 sa mga pasistang mamamatay-tawo ni Duterte.

Gihikyad sa kumand sa BHB nga subay sa imbestigasyon niini, ang lima nga mga biktima anaa sa kustodiya sa mga sundalo ubos sa 10th Infantry Division sukad pa sa gabii sa Pebrero 23 ayha sila gipresenta isip “napatay sa usa ka engkwentro” pagkaugma. Nasuta niini nga ang mga biktima gi-harang sa usa ka tsekpoynt sa militar sa Barangay Poblacion, New Bataan, Davao de Oro.

Niadtong Pebrero 24, nakit-ang nagkatag ang mga wala’y kinabuhi nga mga lawas sa lima sa usa ka lapukon nga dalan sa Purok 8, Barangay Andap.

Pila ra ka mga kilometro ang gilay-on sa maong tsekpoynt sa hedkwarters sa 66th Infantry Battalion sa New Bataan.

Sa inisyal nga mga taho gikan sa Save Our Schools Network nga mitabang sa pamilya ni Booc sa pagkuha sa iyang patayng lawas, nag-ingon nga aduna kini mga samad ug bun-og, nagpakita sa posibleng timailhan sa toryur samtang naa kustodiya sa militar.

“Pagasiguruhon sa BHB sa Southern Mindanao nga kab-oton ang rebolusyonaryong hustisya sa pagpatuman sa gubat sa katawhan,” matud ni Rigoberto F. Sanchez, tigpamaba sa BHB-Southern Mindanao.

Gisulti usab sa BHB-Southern Mindanao nga ang pagpatay mahimong usa ka porma sa pagpanimalos sa AFP human nakahiagum og kapildihan niadtong Pebrero 9 gikan sa usa ka ambus sa BHB batok sa mga tropa niini sa Barangay Tandawan, New Bataan.

“Sa pakyas nga pagpanimalos batok sa BHB, gition sa kaaway ang ilang mga pusil sa dili armado nga mga sibilyan, ug gitagawtaw ang mga bakak aron tabunan ang kabangis niini,” dugang ni Sanchez.

Si Marco Valbuena, ang Chief Information Officer sa PKP, nagkanayon nga gipunting sa rebolusyonaryong kalihukan ang AFP ug ang commander in chief niini nga si Rodrigo Duterte nga responsable sa mga pagpatay ug uban pang mga krimen.

“Ubos sa direksyon sa Partido ug sa mga lokal nga organo sa pulitikanhong gahum, pwedeng silutan sa mga yunit sa BHB ang mga nailang mga sad-an sa krimen,” dugang ni Valbuena.

Nanawagan usab si Valbuena sa tanang mga yunit sa BHB sa tibuuk nasud nga magpadayon sa paglunsad og mga taktikal nga opensiba ug mga aksyong punitibo, ilabina batok sa mga pwersa sa AFP, PNP ug mga paramilitar nga responsable sa mga pasistang krimen batok sa katawhan.

Hustisya ang saad sa PKP, BHB alang sa mga gipatay nga mga magtutudlo sa Lumad ug kaubanan
n/a