Ang mga tsekpoynt sa eleksyon sa NPA Surigao, hapsay ug makarunganon—PKP

Kini nga artikulo adunay hubad sa English

Ang Partido Komunista ng Pilipinas (CPP) nagkanayon karong adlawa nga ang mga tsekpoynt nga gimontar sa New People’s Army (NPA) kagahapon sa lungsod sa Cortes, Surigao del Sur, “hapsay ug makarunganon” ug gihimo nga may hingpit nga pagtahod sa tawhanong katungod ug nahiuyon sa kalibutanong makitawhanong balaod.

“Subay sa inisyal nga impormasyon gikan sa lugar, ang mga tsekpoynt gipahigayon sa hapsay nga paagi,” matud ni CPP Chief Information Officer Marco Valbuena.

Matud sa mga taho gikan sa nagkalain-laing buhatan sa midya nga ang mga residente nakamatikod nga dul-an usa ka gatos ka Pulang manggugubat sa NPA ang nagmontar og mga tsekpoynt sa lain-laing bahin sa lungsod sa Cortes, Surigao del Sur. Usa ka yunit sa BHB ang nakadestino sa bahin sa nasudnong haywey sa Sityo Lubcon, Barangay Mabahin, Cortes. Gilibkas ang mga tsekpoynt paglabay sa 30 ka minuto.

Gihulagway ni Valbuena nga “desperadong pakete sa mga bakak” ang mga pangangkon sa 901st Infantry Brigade ug Surigao del Sur Police Provincial Office nga ang mga tsekpoynt sa NPA nakalapas sa IHL.

“Klaro nga ang mga pwersa sa NPA nga nagpahigayon og mga tsekpoynt matinahuron kaayo sa katungod sa mga sibilyan ug wala ra kaayo nakahasol kanila,” matud ni Valbuena. Iyang gipasabot nga ang NPA adunay kagawasan nga magbutang og temporaryong mga tsekpoynt sulod sa ilang mga teritoryo o mga erya sa operasyon aron ipatuman ang mga palisiya sa demokratikong gubyerno sa katawhan.

Nagkanayon si Valbuena nga ang mga tsekpoynt mahimong himoon isip mga lakang aron masiguro ang pagsunod sa mga palisiya sa gubyerno sa katawhan mahitungod sa lagda sa eleksyon nga nagdili sa mga pulitiko sa pagkuyog og mga armadong gwardya, pulis ug sudalo nga kasagarang nagsilbi sa pagpanghadlok sa katawhan.

Sa kaulaw sa gipakitang pwersa sa NPA, nangulipas ngadto sa mga residente si Maj. Francisco Garello, tigpamaba sa 4th ID, pinaagi sa pagsulting dili tukma ang taho ug “mga 20 ka rebelde” lamang ang nagmontar og tsekpoynt.

Sumala sa mga taho, usa ka yunit sa pulis nga gideploy sa mga tsekpoynt ang nakadesisyon nga mobalik sa ilang istasyon human masuta nga kulang ang ilang ihap.

Ang mga tsekpoynt sa eleksyon sa NPA Surigao, hapsay ug makarunganon—PKP
n/a