Opisyal a Pahayag maipanggep iti peke nga encounter sadiay Asinga Via, Baggao 5th ID, ulbod!

Agmauyong san ti 5th Infantry Division Philippine Army nga agpartuat ti labanan uray nu awan ti aktwal a napasamak nga engkwentro. Pasig nga inuulbod ken paset ti disimpormasyon ti ipabpablaak ti 5ID nga engkwentro kano iti nagbaetan ti tropa ti NPA ken 77 IB sadiay Sityo Sakat, Asinga Via, Baggao idi agsapa ti Miyerkules, Mayo 11. Kasta met nga awan pulos ti naklining da nga aniaman nga armas wenno personal a gamgamit ti kakadua.

Napalalo ti lastog ken desperasyon ti 5ID a parmeken ti NPA iti probinsya nangruna ta mano aldaw laeng ket aggibusen ti termino ni US-Duterte. Isu a kabulbulon ti “last push” wenno maudi a duron ti AFP ti panagpatayab da iti fake news tapno allilawen ti masa ken kontrolen ti taray ti impormasyon ken damag iti kaaw-awayan. Sakbay ti nasao nga labanan kano ket ti padamag da nga engkwentro manen iti NPA ken militar idi Pebrero 28 sadiay KM16 Sta. Margarita, Baggao. Awan ti napasamak a panagririnnaut ketdi, kasla agballa nga aso a pinaltupaltogan ti militar ti angin ken aglawlaw da.

Nasken a sigud a masungbatan ken maibutaktak dagiti inuulbod, disimpormasyon ken panangkillo ti AFP. Rumbeng nga agbalin a managparnuay dagiti yunit ti NPA ken rebolusyonaryo nga organisasyon ti masa kasano a maiwaragawag ti bangsit ken panaglabsing ti karbengan-tao ti AFP. Karit kadagiti yunit ti NPA iti probinsya kasano a mapaidaman ti 5ID a “maka-score” iti mabatbati nga aldaw ni Digong. Rumbeng a pagbalinen nga awan-serserbi na dagiti drone, reconnaissance plane ken dadduma pay a nadudur-as nga ramit ti AFP babaen iti nasirib a panagaramat ti taktikang gerilya ken nairut a panag-iggem ken aplikasyon ti prinsipyo ti nalawa ken nasedsed a gerilya a pannakidangadang babaen ti lumawlawa ken umun-uneg a base a masa. ###

5th ID, ulbod!
n/a