40, kaswalti sa AFP sa Bukidnon sa bulan sa Hulyo

Regions
July 31, 2018
Share and help us bring this article to more readers.

Malampusong nalunsad sa Bagong Hukbong Bayan-Bukidnon (Mt. Kitanglad Subregional Command) ang lain-laing tipo sa aksyong militar batok sa mga tropa sa Armed Forces of the Philippines (AFP) niining bulan sa Hulyo. Gikatahong kapin-kon-kulang 40 ang kaswalti sa AFP, kung asa kapin 10 ang napatay ug dili usab moubos sa 30 ang samaron.

Ang mosunod mao ang pipila sa mga gihimong armadong aksyon sa BHB-Bukidnon:

1) Hulyo 10, alas-10 sa buntag, giharas sa usa ka tim sa mga Pulang manggugubat ang usa ka platun sa 1st Special Forces Battalion (SFB) samtang naglunsad og operasyong militar sa Brgy. Lacolak, Baungon. Usa ang patay ug duha ang samaron sa AFP.
2) Hulyo 13, alas-12:14 sa hapon, giharas na usab ang laing kolum sa 1st SFB, nga nagresponde sa nahitabo niadtong Hulyo 10. Nahitabo kini sa Brgy. Napulon, sa susamang munisipalidad, kung asa walo ka metros lamang ang gilay-on sa BHB ngadto sa mga pwersa sa militar. Nakumpirmang lima ang patay ug 13 ang samaron sa AFP.
3) Hulyo 15, ala-1:15 sa hapon, giposisyunan sa mga Pulang manggugubat ang nagreimpors nga pwersa sa AFP sa Brgy. Lacolak, Baungon.
4) Hulyo 21, alas-5 sa hapon, napakyas ang mga tropa sa AFP sa pag-ambus sa mga Pulang manggugubat nga naghakot og suplay. Inay, nailog sa BHB ang inisyatiba ug nakaplastar sa paborableng posisyon. Duha sa AFP ang samaron.
5) Hulyo 30, alas-12:30 sa kadlawon, gipukaw sa mga Pulang manggugubat og sunod-sunod nga buto ang mga nahinanok nga sundalo sa detatsment sa Brgy. Mendez, Pangantucan. Sa inisyal nga taho, mikabat og duha ka minuto ang binayloay sa bala.
6) Hulyo 31, alas-3:40 sa hapon, gi-ambus sa BHB ang gisakyan sa mga sundalo sa Brgy. New Eden, Pangantucan. Wala gilayon nakaresponde ang AFP. Duha ang patay ug lima ang samaron sa kasundaluhan.

Taliwala sa ginaatubang nga sustinido ug mas gipabangis nga pagpangatake sa rehimeng Duterte ug AFP, padayong nanglimbasog ang BHB nga tubagon ang yangongo sa katawhan. Sa mga ginalunsad nga operasyon sa militar, labaw pang nabutang sa peligro ang panginabuhian ug seguridad sa mga masang mag-uuma, sama na lamang sa pugsanong pagpasurender kanila, pagpanghulga, pagpatay ug uban pang paglapas sa ilang katungod-tawo. Busa, pagaatubangon sa BHB ug sa katawhang dinaug-daog ug pinahimuslan ang tanang kontra-katawhang laraw sa estado. Inay, siguradong mapakyas ang rehimen, tungod kay dugay na kining napamatud-an sa kasaysayan.

40, kaswalti sa AFP sa Bukidnon sa bulan sa Hulyo