2 sibilyan gin-abduct sang tropa militar

,

Duha ka miyembro sang Mahalang Farmer’s Association (MAFA) ang gin-abduct sang mga katapo sang 94th IBPA sa Sitio Mambalayong, Barangay Mahalang, Himamaylan City, Negros Occidental sadtong Hulyo 15. Nakilala ang mga biktima nga sila Gerald Ganti kag Dalen Alipo-on, mag-asawa kag may duha ka kabataan.

Pasado alas 11:30 sang gab-i sang ginsulod ang ila panimalay sang indi magnubo 20 ka tropa sang 94th IB upod ang apat nga nakilal-an nga sanday Gary “Dodong” Mahinay, Jose “Soli” Mahinay, Johnrey “James” Hilado kag isa ka alyas Miguel. Ginpangwas-ag ang kagamitan sa balay kag pilit nga ginpaguwa ang duha. Ginbutong pa ang iloy nga si Dalen bisan naga-uyat ini sa iya isa ka tuig nga bata.

Sa pihak sang pagpanikasog sang ginikanan nila Gerald kag Dalen, wala ini sang nahimo para punggan ang mga armadong pwersa sang militar kag pilit nga ginsakay sila sa salakyan. Gilayon nga nagpa-blotter ang ila pamilya sa police station pero tubtob subong wala pa gihapon nakita ang mag-asawa kag wala pa man nahibaloan sang pamilya kon diin gindala sang mga militar ang ila himata.

Ang duha ka biktima mga aktibong miyembro sa lokal nga asosasyon sang mga mangunguma sa ila lugar. Makapila ka beses na ini nga ginred-tag, ginharas, ginapahug kag ginakadtu-an ang ila balay para pasurenderon sila bilang mga NPA.

Upod sa ila pamilya, ginapanawagan sang bilog rebolusyonaryong pwersa nga untaton ang sunod-sunod nga pagpang-ipit kag pagpangdakop sang mga sibilyan kag sa mga ginadudahan nila nga mga suporter sang NPA. Dapat sabton man sang lokal nga gobyerno ang mga kaso sang mga pagpanglapas sang tawhanon nga kinamatarung nga ginakomiter sang mga AFP-PNP sa ila erya nga nasakupan.

Untaton ang militarisasyon sa kabukiran!
Bungkagon ang NTF-ELCAC!
Ipadayon ang Peace Talk!

2 sibilyan gin-abduct sang tropa militar
n/a