Ti PRIDE ket maysa a protesta, panakidangadang dagiti maidadanes

Translation/s: English

Itatta a bulan ti Hunyo ket iselebrar tayo ti “pride march” – kolektibo a panagtignay ti umili tapno irupir ti karbengan dagiti LGBT (lesbian, gay, transgender ken dadduma pay). Nagrugi daytoy kas paset ti panakidangadang dagiti LGBT laban iti diskriminasyon, kas met iti panagpakita ti suporta dagiti LGBT kadagiti magungudawayan a mangmangged, ken maysa met laeng a martsa ti panakikaykaysa kadagiti LGBT. Ingana iti agdama, napateg daytoy nga agtultuloy a panaglagip ken demokratiko a panakidangadang.

Dagiti LGBT ket paset met laeng dagiti nadumaduma a demokratiko a dasig kas iti mannalon (karaman dagiti makitegged -talon), mangmangged (lallalo dagiti kontraktwal ken awanan permanente a trabaho), peti-burgesya (kas kadagiti propesyonal), ken nailian a burgesya (addaan dadakkel a lokal a negosyo). Gungundawayan ida dagiti appo’t daga, dadakkel a burgesya a kakumplot dagiti imperyalista ken dagiti burukrata kapitalista nga ibagbagi ti agdama a macho-pasista a turay a US-Duterte. Malaksid iti pang-ekonomiya ken politikal a panaggundaway, masagsagrap da met ti nakaro a diskriminasyon ken panangidadanes basar iti gender and sexuality da gapu iti kinabulok ti agdama a gimong a mala-kolonyal ken mala-pyudal.

Ti Leonardo Pacsi Command, NPA Mt. Province (LPC) ken amin a yunit ti hukbo ti umili nga idadauloan ti CPP, ket nairot a makikaykaysa, mangitantandudo, ken mangsalsaluad kadagiti karbengan ti LGBT ken lumablaban iti amin a porma ti diskriminasyon kanyada. Iti agdama, 16% ti bilang ti LGBT a nalabbaga a mannakigubat a kameng ti LPC. Iti intar ti hukbo ti umili, maisigsigurado met ti karbengan da iti tay-ak ti ekonomiya, politika ken militar, ken iti tuloy-tuloy a panagpadur-as ti laing ken kabaelan da. Aktibo ti LPC iti panaginnadal, panangilinteg kadagiti kamali a kapanunotan laban iti LGBT, ken iti panangisayangkat kadagiti aktibidad kas iti solidarity night ken panagaramid ti pabuya, daniw ken kanta. Bigbigbigen ti LPC dagiti LGBT nga inkasar ti Partido kas paset ti karbengan da iti panag-ayat ken panagbukkel ti rebolusyonaryo a relasyon ken pamilya.

Ti panangisayangkat ti agdama a nailian demokratiko a gubat ket para iti panangrisut kadagiti risiris iti baet dagiti dasig ken gun-oden dagiti lehitimo a dawat ken pakaseknan ti umili a Pilipino. Paset na daytoy ti panangwayawaya kadagiti LGBT iti amin a porma ti diskriminasyon ken panangidadanes inggana iti naan-anay a panagbigbig iti karbengan da kas LGBT.

Maaw-awis amin nga LGBT nga ipangato ti tukad ti panakidangadang babaen iti panakilaok iti naindasigan a rebolusyon ken panagsampa iti NPA .

Nalabbaga a saludo kadagiti LGBT a makidangdangadang! Agbiag!