MCC-NPA: Aprobado nga Anti-terrorism Bill sang Kongreso Pagpatay sang Demokrasya kag Kahilwayan sang Pumuluyong Pilipino

 

“Lutong-makaw” ang madasig nga pagpasar sang Kongreso sang Anti-terrorism Bill sang nagligad nga adlaw sa pihak sang Covid-19 pandemic.

Makahuluya ang “copy paste” nga estilo sang Kongreso sa mga proposisyon sang Senado diin ginpaboran naman sang 168 ka mga kontra-pumuluyo nga kongresista nga wala sang madalum nga painu-ino para sa interes kag kinamatarung sang malapad nga pumuluyong Pilipino.

Nadumduman antis pa sang pag-aprobar sang manubo nga panalgan sang kongreso, naghatag na sang sertipikasyon si Duterte sa madasig nga pagtalakay sang Anti-terrorism Bill sa Kongreso.

Imbes nga hatagan solusyon ang gina-atubang nga krisis sa Coronavirus nga pandemya kag lapnagon nga gutom sa pungsod, nagahingagaw ang rehimeng US-Duterte upod sa mga militarista nga sanday Lorenzana, Año, Esperon kag iban pa nga mga alipuris sini sa militaristang solusyon sa paghinabon sang ila mga kapalpakan sa aspeto sang pulitika, ekonomiya, ikaayung-lawas kag iban pa.

Ang pagpasar sang Anti-terrorism Bill sang kongreso nagapalala lamang sang paglapas sang tawhanon nga kinamatarung. Nagahatag ligwa sa awtoridad kag sa ehekutibo sa pag-abuso sang ila poder batok sa nagahimakas nga pumuluyo kag mga kritiko sang rehimeng US-Duterte bangud sang mga mapiguson sini nga mga probisyon.

Kaangay sa ginasuspetsahan nga terorista, mahimo nga dakpon sang arresting officer sang estado paagi sa “designated council” nga wala sang warrant of arrest kag madetinar sa sulod sang 14-24 ka adlaw bisan wala sang kaso nga napasaka sa biktima. Subject ang indibidwal ukon grupo nga ginasuspetsahan sang estado kag awtoridad sa red-tagging, surveillance, wire tapping/monitoring sa mga opisina kag iban pa. Bulnerable man ang indibidwal nga makasuhan sang inciting to sedition, rebellion kag iban pa bisan wala sang maathag nga ebidensiya batok sa natungdan.

“Fast track” ang ginhimo sang Kongreso kag Senado sa pagpasar sang Anti-terrorism Bill. Nagabuyagyag ini sang ila pag-abuso sa poder sa pag-intimidar sa nagahimakas nga pumuluyo kag mga kritiko sang rehimeng US-Duterte. Kakonsabo sila sa utok-pulbura nga mga heneral kaangay ni Lorenzana sang DND, Año sang DILG kag iban pa nga commanding officer sang Armed Forces of the Philippines kag Philippine National Police.

Nagabuyagyag man nga ang estado mismo ang matuod nga terorista kag nagagamit sang “Kangaroo Court” sa katumanan sang ila personal nga mga interesis.

Sistematiko ang plano ni Duterte. Paagi sa pagpasar sang Anti-terrorism Bill nagahawan sang dalan ni Duterte sa pagpatuman sang Martial law sa pungsod. “Kapit-tuko” ang rehimeng Duterte nga magpabilin sa poder gamit ang mahigko kag mapintas nga kamot sang estado

Indi garantiya ang Anti-terrorism Bill sa seguridad sang pumuluyong Pilipino. Kon madamo ang nangin biktima sang extra-judicial killings, illegal arrests, red tagging, intimidations, vilifications, impunity kag iban pa sa kampanya kontra-druga kag kontra-insurhensiya sang rehimeng US-Duterte diin direkta nga ginakomiter sang AFP kag PNP. Sa Anti-terrorism Bill mas naga-enganyo pa sa pasistang AFP kag PNP sa masingki nga paglapas sang tawhanon nga kinamatarung agud busalan ang baba sang nagahimakas nga pumuluyo kag mga kritiko. Ginapatay sini ang demokrasya kag kahilwayan sang pumuluyong Pilipino.

Mabaskog nga ginakondenar sang Mount Cansermon Command New People’s Army sa South-Central Negros ang pag-aprobar sang Anti-terrorism Bill sang Kongreso.

Ginapanawagan ang malapad nga pumuluyo sa South Central Negros nga maghiusa kag maghimakas sa pag-reject sang Anti-terrorism Bill. Itib-ong ang tawhanon nga kinamatarung, demokrasya kag pungsodnon nga kahilwayan! Magintra sa NPA! ###