Ibutaktak ken labanan ti panangallilaw ken pammutbuteng ti 24th IBPA iti Mt. Province!

 

Saanen a mailibak dagiti tropa ti Philippine Army (PA) ti pudno a kagagalad ti reaksyunaryo nga Estado — manangallilaw, naranggas, ken kontra-umili.

Ipabpablaak ti Leonardo Pacsi Command ( NPA – Mt. Province ) ti panangaramat dagiti tropa ti 24th Infantry Battalion kadagiti daan a taktika ti saywar (psychological warfare) tapno buraken ti panagkaykaysa ti umili.

Segun kadagiti ulat nga ipapaabot ti umili iti nadumaduma a paset ti Mt. Province, madama nga agrikrikus dagiti pasista a tropa nga agpampammarang a kas “kakadua” wenno NPA.

Aginkukuna dagitoy a “naisina da iti kakadua” isunga agbirbiruk iti “mapagtalkan a masa” nga isu’t ibaon da a mangitudo iti ayan ti NPA.

Nayona na, agkankanta da ti progresibo a saniweng wenno agipakita ti ladawan ti nalatak a kameng ti NPA tapnu maala ti talek ti umili.

Dakes na pay, adda met laeng dagiti tropa nga “agbirbiruk iti nakadulin nga armas” iti balay ti umili.

Inda kanu alaen dagitoy tapnu mausar iti mairussuat a taktikal nga opensiba.

Daytoy ket daan a taktika dagiti pasista a tropa ti reaksyunaryo nga Estado tapnu rebbeken ti panagtitinnalek dagiti agkakailian ken ti nairut a silpu ti masa iti NPA ken ti rebolusyonaryo a tignayan.

Kas iti dadduma a paset ti pagilian, panggep ti civil-military operations (CMO) ti AFP nga agimula iti ahente ti intelligence iti uneg ti ili.

Liplipiten da met laeng dagiti barangay officials, aktibista, wenno dati nga NPA tapnu pagbalinen da dagitoy nga asset ti Army.

Saan nga maiduma daytoy iti madama a kampanya a panangpasurender kadagiti umili iti Tubo, Abra ken dadduma a paset ti Kordilyera, nga isu’t iparang ti Army a kas “NPA surrenderees”.

Malagip met laeng ti panagaramat da iti nagan ti NPA tapnu mano a daras a dumawat ti dakkel a gatad ti kuwarta manipud kadagiti opisyal ken empleyado ti gobyerno iti nasao a munisipyo.

Kalpasan ti panagsukisok, natakwatan a dagiti cellphone numbers, lugan, ken dadduma pay a nausar iti panangallilaw ket nakasilpo iti maysa a pulis ti Abra/army ti 24th IBPA. Ngarud, pakpakdaaran ti NPA – Mt. Province ti umili laban iti narugit a taktika ti Army a paset met laeng ti todo-gera nga irusrussuat ti reaksyunaryo nga Estado.

Rumbeng laeng nga ibutaktak ken labanan ti panangallilaw ken pammutbuteng ti 24th IBPA iti Mt. Province.

Iti sango na, rumbeng tayo a patibkeren ti panagkaykaysa ti umili, palawaen dagiti organisasyon ti umili ken pairtengen ti tignayan masa para iti karbengan.

Kas Hukbo ti umili, rebbengen ti NPA-Mt. Province a pasingkedan ti kolektibo ken militante a panagtignay ti umili nga isu’t mangrebbek iti aniaman a kinarugit ken kinaranggas ti Estado.

Labanan ti Oplan Kapanatagan!
Rippuogen ti pasista a rehimen US-Duterte!
Iyabante ti gubat ti umili!