Angut sa engkwentro sa Sitio Mayong, Brgy. Tordesillas, Sibalom, Antique

Matuod ang engkwentro nga natabo sa Sitio Mayong Brgy. Tordesillas Sibalom, Antique sang nagligad nga Abril 18, 2020, pasado alas-10 sang aga apang kabutigan ang ginapalapta nga balita nanday Benedict Batara sang 61st IB kag Marion Sison sang 301st Infantry Brigade.
Nakapreparar na ang yunit sang New People’s Army sa idalom sang Mt. Napulak Command antes pa man tuyo nga lusubon sang mga tropa sang 61st IBPA ang ginabasehan sang yunit. Isa ka active defense ang gintigayon sang yunit sang NPA sa tunga sang hugot nga pagsunod sa extension sang unilateral ceasefire declaration sang Communist Party of the
Philippines. Wala sang myembro sang NPA ang nadakpan, nasamaran ukon napatay sa nasambit nga engkwentro. Wala man sang mga gamit kag pusil nga nabilin sa lugar nga natabuan sang insidente.

Ang ginawaragwag nanday Batara kag Sison nga napatay nga kunu katapu sang NPA amu ang isa ka 50 anyos nga mangunguma kag kagawad sang Brgy. Onop, Miag-ao, Iloilo. Ang mga ginpangdakop kag ginpatu-patuan nga katapo sang NPA ang lunsay mga sibilyan nga residente sang Brgy. Ipanulong, Tordesillas kag Bulalacao sa banwa sang Sibalom, Antique. Walo sa mga ini kalakip na ang ginapanghambal nila nga mga menor-de-edad ang mga manugpuhag sang putyukan kag nagatipon sang honey ukon dugus nga ila balaligya. Komon ini nga palangitan-an sang nasambit nga mga kabaryuhanan ilabi nagid subong nga indi sila makatrabaho sa tunga sang krisis sang COVID 19 kag pagpabaya sang estado. Ang pila man sa mga ginpangdakop, ang mga residente nga may mga ulumhan sa Sityo Mayong, Tordesillas nga nagagarab sang kugon agud himuon nga atop sa kamalig kag gulpi lang ginpangdakop sang PA bisan pa malayo na ini sa lugar sang engkwentro. Isa ka desperado kag tudok sa tul-an nga pasista nga tikang sang militar ang pagdakop, pagpatay kag pagpatu-pato nga mga NPA sa mga ordinaryo nga mangunguma kag pamatan-on.

Lunsay kabutigan man ang madugay na nga ginawalwal nga may mga menor-de-edad nga katapo sang NPA bangud ang mga 18 anyos pasaka nga may maayo nga panglawason kag pamensaron ang pwede lang magpatapu sa NPA.

Ginatib-ong kag hugot nga ginapatuman sang tanan nga yunit sa idalom sang NPA-Mt. Napulak Command ang extension sang unilateral ceasefire declaration tubtob Abril 30. Manduini halin sa Central Committee-Communist Party of the Philippines agud nga makatutok ang tanan nga yunit sang NPA sa pagbulig sa pumuluyo sa pag-atubang sa pandemya sang COVID 19.