AFP, padayong galunsad og operasyon taliwala sa ceasefire

 

Garapalan nga ginalapas ni Lt. Col. Ronald Illana , kumander sa 8th Infantry Battalion, ang gideklarang hunong-buto sa gobyerno sa Pilipinas pinaagi sa pagpasugok sa iyang mga pwersa sa mga kabukiran sa Impasug-ong. Gikatakdang matapos ang maong deklarasyon sa Enero 7, 2020. Apan sukad pa lang niadtong Disyembre 23, 2019, platun-platun sa mga sundalo ang naglunsad og operasyong militar.

Kahinumduman nga niadtong Disyembre 23, sa mismong unang adlaw sa hunong-buto, gisulong sa mga grupong paramilitar ang kampo sa NPA sa Brgy. San Vicente, Esperanza, Agusan del Sur.

Pagka-sunod adlaw dayon, Disyembre 24, adunay duha ka sakyanan nga dunay sakay nga sundalo gikan sa kampo sa Impasug-ong ang niagi sa Kaanibungan, Brgy. Calabugao, Impasug-ong, Bukidnon ug nisulod sa Brgy. Hagpa, sa susamang munisipyo.

Niadtong Enero 2, 2020, nagsakay usab og upat ka sakyanan ang mga sundalo nga misulod sa Sityo Mahagwa, Brgy. Hagpa ug duna usay laing usa ka platun sa Sityo Magawa, Brgy. Bulonay, pareho sa susamang munisipyo. Sa susamang adlaw usab, gimontar ang duha ka kanyon sa Brgy. Hagpa ug duha usab sa Brgy. Calabugao.

Pagka-sunod adlaw, duna na usay presensya sa kasundaluhan sa KM90, Brgy. Hagpa. Duna na usay nisulod nga laing duha ka sakyanan sa Sityo Mahagwa. Nasayran nga mokabat sa 40 ang pwersa sa sundalo ug nagpundo kini sa eskwelahan sa maong sityo.

Sa Brgy. Tagbalili, Esperanza, Agusan del Sur, nisulod usab ang mga sakop sa 26th IB sakay sa tag-lima ka motor matag adlaw sukad Enero 2 hangtud 4.

Pagka-Enero 4, nagtuyuk-tuyok na ang surveillance drone sa Sityo Mahagwa.

Pagka-uhaw-sa-dugo ug pagka-kamaliputon ang padayong paglutos sa AFP sa mga Pulang manggugubat. Ginapamatud-an lamang ni Illana ang pagka-mersenaryo sa armadong kusog sa nasud nga, kung asa, dayagan niining ginalapas ang mga napatik nga kasabutan tali sa rebolusyonaryong pwersa sa kaalaot sa usa ka makatarunganong gubat.