PKP: Walay basihan ang pagkundena sa CHR sa BHB

,
Kini nga artikulo adunay hubad sa PilipinoEnglish

Gisaway sa Partido Komunista ng Pilipinas (PKP) karong adlawa ang Commission on Human Rights (CHR) nga wala kiniy basihan sa pagkundena niini sa gitawag niining “mga kalapasan sa Bagong Hukbong Bayan” sa mga balaod sa gubat ug sa internasyunal nga makitawhanong balaod. Gikundena bag-o lang sa CHR ang armadong aksyon nga gilunsad sa NPA-Sorsogon batok sa hedkwarters sa 504th Police Maneuver Company sa Philippine National Police niadtong gabii sa Pebrero 28. Napatay sa armadong aksyon si P/Cpl. Ryan M. Atos, samtang lain pang pulis ang nasamdan.

Giduso ni Marco Valbuena, information officer sa PKP, nga ang armadong aksyon nga gilunsad sa BHB sa Sorsogon usa ka lehitimong operasyong militar ug nahiuyon sa mga lagda sa gyera ug internasyunal nga makitawhanong balaod. “Gitarget niini ang usa ka detatsment sa pulisya ug wala’y sibilyan ang nasakitan,” matud niya.

Ang tigpamaba sa NPA-Sorsogon nga si Samuel Guerrero nagkanayon nga ang operasyon kabahin sa padayong pagtubag sa NPA sa gipangayo sa katawhang Sorsoganon nga hustisya sa mga biktima sa terorismo sa mga armadong pwersa sa rehimeng US-Duterte.

Gawas sa insidente, makadaghang higayon na usab nga “gikundena” sa CHR ang armadong mga aksyon sa NPA ilabina sa Bicol. Gipunting ni Valbuena nga “paspas nga ginakundena” sa CHR ang NPA apan walay napatuman nga pag-imbestiga sa kaylap nga mga krimen nga binuhatan sa pulis ug militar batok sa mga sibilyan.

“Ang CHR, nga adunay nag-unang tahas nga magsilbing human rights ombudsman, wala naghimo ni unsamang pamahayag o imbestigasyon sa mga kaylap nga kaso sa pagpanglapas sa tawhanong katungod nga binuhatan sa pwersa sa AFP ug PNP, lakip ang daghang kaso sa gipatay nga mga sibilyan ug iligal nga giaresto sa Sorsogon,” dugang ni Valbuena.

Sukad sa 2020, adunay labing menos 12 nga mga kaso sa ekstrahudisyal nga pagpatay batok sa dili armado nga mga sibilyan. Labing menos 24 nga mga sibilyan ang gi-red-tag, arbitraryong giaresto ug gipasakahanog non bailable (walay pyansa) nga mga krimen aron palanaton ang dili makatarunganong detensyon kanila sa prubinsya.

Gipagula usab sa AFP ang labing menos unum ka pekeng pamahayag sa midya aron ipagawas nga ang dili armadong mga mag-uuma nga gipatay sa mga sundalo niini, napatay sa armadong engkwentro. Lakip sa pinakagrabe mao ang pagpatay sa lima ka mag-uuma sa Barangay Dolos, Bulan kaniadtong Mayo 8, 2020.

“Wala namo nadungog ang CHR sa pagpagula og pamahayag o pagpahigayon og imbestigasyon sa maong mga kaso,” dugang ni Valbuena.

AB: PKP: Walay basihan ang pagkundena sa CHR sa BHB
n/a