Apat nga may balatian nga Pulang hangaway, ginmasaker

,
Ang artikulo nga ini may salhin sa PilipinoEnglish

Wala-kaluoy nga ginpatay sang mga suldado sang 94th IB kag lokal nga pulis ang apat nga may balatian nga Pulang hangaway sang Bagong Hukbong Bayan sa Sityo Calunakon, Barangay Santol, Binalbagan, Negros Occidental kaagahon sang Hulyo 6. Nagapaayo ang mga hangaway sang arestuhon sa ila ginadayunan nga balay. Imbes kabigon nga mga bihag sang inaway santo sa internasyunal nga makatawong layi, ginmasaker sang mga suldado sanday Roel Ladera (Ka Jack), Nica de la Cruz (Ka Chai), Alden Rodriguez (Ka Rocky), kag Roel Deguit (Ka Caloy). Ginpagwa sang mga suldado nga napatay ang apat sa isa ka engkwentro sa kaiping nga barangay.

Sang Hunyo 29, ginluthang sang wala makilala nga lalaki si Federico “Deng” Gempesaw, anawnser sa radyo, samtang nagapauli sa ila nga puluy-an sa Sityo Macangan, Barangay Carmen, Cagayan de Oro City. Ikatlo si Gempesaw sa mamahayag nga ginpatay sa Mindanao subong lang nga tuig.

Pagpangbungkag. Mapintas nga ginbungkag sang mga bayaran nga maton ang welga sa Tanduay Distillers sa Talisay, Negros Occidental sang Hunyo 28. Sa bidyo nga ginpagwa sa social media, ginapangsipa sang mga maton sang Talisay Logistics Packaging Corporation ang mga mamumugon kag mga tolda nga gintukod sang Tanduay Bottle Sorters Organization (TanSO-SUPER). Ginlunsar nila ang welga batuk sa plano sang kumpanya nga buhinan ang adlaw sang ila trabaho nga magaresulta sa pagbagsak sang ila nga sweldo. Panawagan man nila ang pagbalik sa mga ginpahalin, regularisasyon sang mga kontraktwal kag paghatag sa ila sang mga benepisyo.

Pag-aresto. Sa Aklan, 30 elemento sang 301st IBde ang nagpamalay-balay sa mga sityo sang C. Laserna St., Poblacion, Kalibo sang Hunyo 22 para lagson kag hibal-on ang nahamtangan nanday Kim-Sin Tugna kag George T. Calaor, mga upisyal sang Bayan-Aklan.

Samtang, gin-aresto sang lokal nga pulis si Susan Agner, lider sang Pamalakaya sa Maragondon, Cavite, lakip ang tatlo pang residente sang Barangay Patungan sang Hunyo 23.

Militarisasyon. Halin Mayo 28, ginpalibutan sang mga elemento sang 303rd IBde ang 32 sityo, lima ka barangay sa Himamaylan City kag Moises Padilla sa Negros Occidental. Sakop man sang ila nga operasyon ang mga erya sang La Libertad, Guihulngan City kag Vallehermoso sa Negros Oriental.

Sa Himamaylan City, masobra 600 suldado ang nakakampo sa 24 ka sityo sa apat ka barangay diri. Pangunahon nga apektado diri ang mga tumandok nga Tribu Magahat kag Bukidnon nga nagapuyo sa lugar. Pito ka sibilyan, lakip ang duha ka menor de edad, ang iligal nga gin-aresto kag gin-interoga sa Sityo Lonoy kag Conalum.

Ginsalakay man ang upisina sang asosasyon sang mangunguma sa barangay Carabalan kag gin-interoga ang tagapangulo sang asosasyon. Ginkumpiska man sang mga ini ang mga papeles kag ligal nga kalig-unan sang asosasyon. Sa Moises Padilla, masobra 100 suldado ang nakapwesto sa mga Sityo sang barangay Quintin Remo.

Pwersahan nga pagpasurender. Ginpanginwala sang mga residente kag sang BHB-Mt. Apo Subregional Command ang pagparada sang 72nd IB sa mag-amay nga sibilyan bilang mga Pulang hangaway sa Barangay Magsaysay, Kibawe, Bukidnon sang Hunyo 23. Liw-as sa pahayag sang AFP, ang duha mga mangunguma sa lugar.

Samtang, nahilway na si Nimfa Lazanas, isa sa mga iligal nga gin-aresto sa koordinado nga serye sang mga pag-aresto kag reyd nga ginbansagan Bloody Sunday sa Southern Tagalog. Ginbasura sang Calamba City Regional Trial Court ang mga kaso batuk sa iya sang Hunyo 29.

Sa amo man, ginbasura sang korte ang una nga duha ka kaso nga ginpasaka sang mga pulis batuk sa #Tinang83 sang Hunyo 27. May lima ka kaso pa nga ginaatubang ang grupo. Sang Hunyo 20, pormal nga ginkilala sang Department of Agrarian Reform ang mga mangunguma bilang lehitimo nga benepisyaryo sang asyenda.

Apat nga may balatian nga Pulang hangaway, ginmasaker
n/a