Tigpanalipud sa kinaiyahan, giaresto

,
Kini nga artikulo adunay hubad sa PilipinoEnglishHiligaynon

Iligal nga giaresto ang tigpanalipud sa kinaiyahan nga si Vertudez “Daisy” Macapanpan, 68, sa Barangay Burgos, Pakil, Laguna niadtong Hunyo 11. Pugos nga misulod sa iyang panimalay ang 40 ka elemento sa mga yunit sa pulis. Bag-o lang siyang namulong kanhi sa usa ka katiguman batok sa magun-ubong Ahunan Pumped-Storage Hydropower Project nga planong tukuron sa Mt. Inumpog sa Sierra Madre.

Upat pa ka kaso sa pagpang-aresto, usa ka kaso sa pagpatay ug usa usab ka sulayng pagpatay ang nataho sa milabayng mga semana.

Gipusil patay sa mga elemento sa 7th IB ang Lumad nga si Calisa Langgaw, 57, residente sa Sityo Matingaw, Barangay Tacuhin, Palimbang, Sultan Kudarat niadtong Hunyo 6. Gipatay si Langgaw, usa ka kagawad sa barangay, samtang nangayam sa bukid sa Oh Luson, sakop sa Sityo Matingaw. Gipagawas sa mga sundalo nga myembro siya sa Bagong Hukbong Bayan (BHB) ug gitamnan og ripleng M16.

Sa Sorsogon, paturagas nga gipusil sa mga wala mailhing kriminal niadtong Mayo 29, alas-9 sa gabii ang mag-amahang mag-uuma sa Barangay Gabao, Irosin. Nasamdan sa pagpamusil ang 16 anyos nga bata ug iyang amahan.

Niadtong Hunyo 4, giutingkay ug gikawatan sa mga sundalo sa 31st IB ang balay ni Ricky Evaso, usa ka mag-uuma sa Barangay Olandia, Barcelona sa parehong prubinsya. Gikawat ang iyang kwartang ₱7,000 nga pangpalit unta og baktin ug aalagaang kuneho (rabbit).

Nagsugod ang operasyong militar sa 31st IB sa mga lungsod sa Gubat, Barcelona ug Bulusan gikan Mayo 24. Nagkampo ang mga sundalo sa barangay hall ug kapilya sa mga barangay sa maong mga lungsod. Nagpatawag og miting ang mga sundalo niadtong Hunyo 2 sa Barangay Bugtong sa Barcelona aron pugsong “ipasurender” ang mga lumulupyo.

Sa Ifugao, gidagit ug pugos nga gipasurender sa 7th ID si Emmanuel Tan sa Barangay Namal, Asipulo niadtong Mayo 30. Si Tan usa ka organisador pangkultura sa komunidad sa mga mag-uuma ug lumad sa lugar.

Niadtong Hunyo 12, iligal nga giaresto sa mga sundalo sa 62nd IB si Macario Fat Sr, usa ka lider-mag-uuma, sa Guihulngan City.

Sa Masbate, gikan Mayo 30 hangtud Hunyo 1, duha ka mag-uuma ang gidakop sa kasong pagpatay ug paglapas sa Anti-Terror Law, samtang ang tulo ka kauban nila sa kaso pugos nga gipasurender sa lokal nga pulis sa lungsod sa Cataingan. Giakusahan silang mga myembro ug tigsuporta sa BHB.

Tigpanalipud sa kinaiyahan, giaresto
n/a