Ginatos ka pamilya sa Maguindanao, Lanao kag Ifugao, nagbakwit bangud sa pagpamomba kag militarisasyon

,
Ang artikulo nga ini may salhin sa PilipinoBisayaEnglish

Nagbakwit ang ginatos ka pamilya sa mga banwa sa Maguindanao, Lanao del Sur kag Ifugao pagkatapos ang serye sang pagpamomba kag militarisasyon sang Armed Forces of the Philippines (AFP) sa ila nga mga komunidad sang Mayo 23.

Masobra 600 pamilya sa banwa sang Datu Salibo, Maguindanao ang napilitan nga magbakwit pagkatapos sang pagpamomba sang AFP sa Barangay Ganta. Ginpagwa sang mga suldado nga target sang pagpamomba ang isa ka “grupo sang terorista.”

Suno sa mga residente sang Datu Salibo, nakibot sila sang gulpe nga maglanog ang mabaskog nga mga pagbomba halin sa duha ka FA-50 fighter jet kag duha ka MG-520 attack helicopter mga alas-7 sang aga. Nagpangbomba man sang mga 105 mm howitzer nga nakapwesto sa isa ka kampo sang militar.

Disgustado ang mga residente bangud natabo ang pagpamomba samtang ginahanduraw nila ang anibersaryo sang pagsakop sang Marawi City sang 2017.

Sa Ifugao, 122 pamilya o masobra 500 katawo ang nagbakwit sa Barangay Namal, Asipulo dulot sang malaparan nga operasyon militar sang 54th IB pagkatapos ang kuno engkwentro sang yunit sini sa Bagong Hukbong Bayan.
Ginpunggan sang lokal nga gubyerno ang mga residente nga magbalik sa ila nga komunidad nga tuman nga nakaapekto sa ila nga pangabuhian.

Beynte uno ka beses nga ginkanyon sang AFP ang mabukid nga bahin sang Maguing, Lanao del Sur sang Mayo 21 halin alas-2 sang kaagahon tubtob hapon. Liwat nila nga ginkanyon ang amo nga lugar sang Mayo 28 sang hapon kon sa diin pito ka bala sang kanyon ang ila nga ginpalupok. Tuman nga apektado sang mga pagpamomba ang pangabuhian sang masang Moro sa lugar.

Samtang, nag-istraping ang AFP gamit ang isa ka Black Hawk nga helikopter sa mabukid nga bahin sang Jabonga, Agusan del Norte sang Mayo 19. Nagdulot sang kahadlok sa mga sibilyan nga komunidad ang amo nga insidente.

Sang Mayo 26, ginwasak sang nagaoperasyon nga mga suldado sang 62nd IB ang maisan kag nagpangawat sang manok sang mga mangunguma sa Barangay Quintin Remo, Moises Padilla, Negros Occidental. Umpisa pa Mayo 12 militarisado na ang amo nga banwa kag kaiping sini nga mga banwa sang Isabela kag La Castellana sa Negros Occidental kag Guihulngan City, Vallehermoso kag Canlaon City sa Negros Oriental.

Pag-aresto. Gindakop sang mga pulis sanday Percival Dellomas kag Darwin Guelas, mga lider mangunguma sa Sorsogon, sa isa ka tsekpoynt sa mga prubinsya sang Sorsogon kag Albay sang Mayo 28.

Si Dellomas ang lider sang Samahang Magbubukid sa Sorsogon samtang si Guelas kabahin sang rehiyunal nga konseho sang Kilusang Magbubukid ng Pilipinas-Bicol. Ginkasuhan si Dellomas sang paglapas sa Anti-Terrorism Law samtang si Guelas ginkasuhan sang himu-himo nga kaso sang pagpatay.
Sang Hunyo 2, gindakop sa Barangay Pinontingan, Gubat, Sorsogon kag ginpasakaan sang himu-himo nga kaso nga pagpatay si Jhen Estiller, myembro sang Amihan-Bicol.

Ginatos ka pamilya sa Maguindanao, Lanao kag Ifugao, nagbakwit bangud sa pagpamomba kag militarisasyon
n/a