Hilwayon si De Lima kag tanan nga bilanggong pulitikal

,
Ang artikulo nga ini may salhin sa PilipinoEnglishBisaya

Nagpanawagan ang mga grupo nga nagapangapin sa tawhanong kinamatarung para sa gilayon nga paghilway kay Sen. Leila de Lima pagkatapos nga bawion sang duha ka yabi nga saksi nga sanday Roland “Kerwin” Espinosa kag Rafael Ragos ang ila mga testimonya nga nagadalahig sa senador sa iligal nga droga. Nagpanawagan man sila nga hilwayon ang kapareho niya nga indi makatarungan nga nabilanggo dulot sang himu-himo nga mga kasong kriminal.

Sa iya ginsumpaan nga panaysayon nga ginpanagtag sa midya sang Abril 28, ginsiling ni Espinosa nga ang mga akusasyon kontra kay De Lima sa duha ka pagbista sa Senado sang 2016 lunsay wala sang kamatuoran. Resulta ini sang pagpang-ipit, intimidasyon kag seryoso nga mga pamahug sa iya kabuhi kag sang iya pamilya.

Sang Mayo 2, ginsiling ni Rafael Ragos, anay officer-in-charge sang Bureau of Corrections, nga wala sang kamatuoran nga si De Lima imbolbado sa pagbaligya sang droga sa New Bilibid Prison. Sa atubang sang midya, ginhambal ni Ragos nga ginpwersa siya sang sadto Justice Secretary Vitaliano Aguirre II agud magtestigo batuk kay De Lima. Siling niya, gin-interoga, ginpwersa kag ginpaandaman siya ni Aguirre para akuon ang mga bagay nga wala naman natabo.

Suno sa mga kritiko sang gera kontra-droga, ginapamatud-an lang sang ulihi nga mga hitabo nga ang kaso batuk kay De Lima paghingabot sa pulitika bangud sa pagka-kritikal niya sa brutal nga kampanya kontra-droga sang rehimeng Duterte.

Panawagan nila, dapat pasabton ang mga tawo nga responsable sa iya indi makatarungan nga detensyon kag mga paglapas sa iya tawhanong nga kinamatarung.

Samtang, gin-ako ni Rodrigo Duterte nga “isa ka kahambugan lang” ang iya promisa nga pagalubaron ang problema sa iligal nga droga sa sulod sang anum ka bulan sang iya pagserbisyo.

Hilwayon si De Lima kag tanan nga bilanggong pulitikal
n/a