Komunidad sa Cagayan, gibomba sa militar

,
Kini nga artikulo adunay hubad sa PilipinoEnglishHiligaynon

Pagpamomba duul sa mga sibilyang komunidad sa Cagayan, iligal nga mga pagpangaresto ug pagpamig-ot sa mga mag-uuma ug lain pang sibilyan ang nataho sa Ang Bayan sa milabayng semana.

Naghulog ang AFP og 30 ka bomba sa upat ka ronda gikan alas-3 sa buntag sa Enero sa Barangay Sta. Clara, Gonzaga, Cagayan, bisan og walay yunit sa BHB sa lugar. Gisundan kini sa pag-istraping nga milungtad og pipila ka oras. Tungod niini, napugos nga magbakwit ang 66 ka pamilya, kadaghanan mga Agta.

Sa Sorsogon, giaresto sa 31st IB ug mga pulis si Ruben Estremadura sa Barangay Sta. Barbara, Bulusan, Sorsogon niadtong Enero 12. Giaresto usab si Renaldo Gaan niadtong Enero 28 sa P4, Barangay Mahaba, Cabadbaran City, Agusan del Norte. Pareho silang giakusahang myembro sa hukbong bayan.

Sa Quezon, gibutyag sa Gabriela-Southern Tagalog niadtong Enero 21 ang pagpanglugos sa usa ka sundalo kang “Belle,” usa ka 15-anyos nga batang babaye. Gidagit si Belle sa mga sundalo sa 59th IB ug gidetine gikan Hulyo 27 hangtud Agosto 13 niadtong 2020. Pugos siyang gipaangkon nga myembro sa BHB ang iyang inahan nga usa ka aktibistang nakigbisog aron ibalik sa mga maglulubi ang pondong coco levy. Nakadesisyon ang pamilya nga ipadangat ang kaso sa Gabriela tungod sa walay hunong nga pagpamig-ot kanila sa AFP.

Sa Bulacan, gipabuthan niadtong Enero 28 sa mga armadong maton ni Gregorio Araneta III, bayaw ni Ferdinand Marcos Jr., ang mga myembro sa mga organisasyong mag-uuma nga nagpahigayon og imbestigasyon sa iligal nga pagdemolis sa Lupang Teresa, Barangay San Roque, San Jose del Monte, Bulacan. Gikawat pa sa mga maton ang mga gamit ug dalang relief goods sa mga mag-imbestiga. Upat ka balay ug mga pananum ang gidemolis niadtong Enero 26.

Komunidad sa Cagayan, gibomba sa militar
n/a