AFP naglunsad og dinagko ug dinugay’ng mga sustinido ug pokus nga operisyong militar sa NEMR

,

Mokabat na sa kapin tulo ka bulan ang gilunsad nga dinagko ug dinugay’ng mga sustinido ug pokus military operisyon sa tri-boundaries sa mga probinsya sa Surigao del Norte, Surigao del Sur ug Agusan del Norte sa Northeastern Mindanao Region (NEMR) gikan Oktubre 2021 hangtod sa kasamtangang bulan sa Enero 2022. Tumong niining operisyon sa kaaway ang damgong mapuo ang rebolusyonaryong kalihukan sa rehiyon ilabina kay pahumanay na ang termino ni Rodrigo Roa Duterte karon Mayo 2022.

Usa kini ka dibisyon operisyon nga gilangkuban sa duha ka brigada ug mga elite forces. Anaa ang 901st brigade kun asa ilalom ang mga nag-operisyong tropa sa 29th IBPA, 30th IBPA ug 36th, IBPA; 402nd brigade, sakop niini ang 65th IBPA; ug Scout Ranger ug Division Reconnaisance Company (DRC). Gibanabanang mokabat sa dul-an libo ang kaaway nga nag-operisyon sa mga kabukiran sa rehiyon. Gigamit niini ang mga abanteng himan iggugubat sama sa mga drones pangsarbeylans, attack helicopters, artilerya ug uban pa.

Kaniadtong Disyembre 12 – 23, 2021, mokabat sa 23 ka mga sakyanan sa kaaway ang nisulod sa Puting Bato, Cabadbaran City, Agusan del Norte. Gilangkuban kining mga nag-operisyong tropa sa 29th IBPA ug 65th IBPA.

Nalunsad ang lima ka serye sa harrasment sa BHB-Agusan del Norte batok sa nagsulod nga kaaway niini nga baryo. Nahitabo kining mga harassment kaniadtong Disyembre 15, 2021, 8:00 AM; Disyembre 19, 2021, 10:00 AM; Disyembre 20, 2021, 9:00 AM; Disyembre 23, 2021, 11:00; ug Disyembre 29, 2021; 12:00 sa udto. Subay sa taho adunay usa ang kompirmadong patay sa han-ay sa AFP samtang usa ka M16 riple ang nabilin sa operatib sa BHB-Agusan del Norte. Walay kaswalti sa han-ay sa Pulang manggugubat.

Naghatod kining mga operisyon sa kaaway og pagpanglapas sa tawhanong katungod sa mga sibilyan sa mga baryong langkob sa operisyon niini. Natugaw ang panginabuhi sa mga tawo. Ginadid-an ang mga mag-uuma sa pag-adto sa ilang mga umahan, dili na makapangayam ang mga Lumad sa kalasangan ug nangilkil sa mga gagmay’ng minero sa erya.

Nanghadlok ug nanghulga ang kaaway sa mga sibilyan. Pagpanghasi usab ang pinatakang pagpabuto-buto nila sa walay mga tinong target panahon kun magpundo kini sila sa mga sityo. Trauma usab sa mga lumulupyo ang pagpamomba sa Philippine Airforce duol sa ilang mga komunidad ug umahan.

Desperado ang rehimeng Duterte ug AFP/PNP sa pagpuo sa rebolusyonaryong kalihukan sa NEMR. Dako kaayo ang budget nga gitagana niining mga dinugay ug dinagkong sustinido ug pokus nga operisyong militar kaysa pagtubag sa krisis sa pandemyang Covid-19 ug paghatag og ayuda sa mga nabiktima sa bagyong Odette.

Magpatabunok lamang ang kabangis sa AFP/PNP ug rehimeng Duterte alang sa mas labaw pang pag-asdang sa malungtarong gubat sa katawhan. Dili nila makabig ang pagbati sa masang Pilipino tungod kay sila ang numero unong nagsabwag og teror sa tibuok nasud. Samtang magpadayon pa ang pagpahimulos ug pagpangdaogdaog sa mga nagharing hut-ong batok sa katawhang Pilipino, magpadayon ang rebolusyonaryong kalihukan hangtod hingpit nga mapadaog ang Demokratikong Rebolusyon sa Katawhan.

AFP naglunsad og dinagko ug dinugay'ng mga sustinido ug pokus nga operisyong militar sa NEMR
n/a