Presyo sa lana, misangko sa langit ang pagsirit

,

Sa milabayng walo ka semana, walo ka beses nga gipatas-an sa mga kumpanya sa lana ang presyo sa mga produktong petrolyo. Kung ibasi sa pagsugod sa tuig, ₱19.70 kada litro na ang nadugang sa presyo sa gasolina, ug ₱18 kada litro usab ang nadugang sa diesel.

Seguradong sangko sa langit ang pagsirit sa mga presyo sa pagkaon ug uban pang produktong pangkonsumo sa umalabot nga mga bulan tungod niini.

Ginasulting ang mga pagtaas sa presyo bunga sa pagsaka sa presyo sa krudong lana ngadto sa $80 kada bariles sa internasyunal nga merkado. Misaka ang presyo sa krudong lana tungod sa pagbalibad sa Organization of Petroleum Exporting Countries, Russia ug mga alyado niini nga patas-an ang produksyon sa krudong lana. Nahitabo kini samtang nagkadaku ang demand alang sa lana sa China ug Europe.

Sa Pilipinas, gitago sa mga kumpanya sa lana ang pormula nga ginagamit niini sa pagtakda sa nagkadaiya nilang mga presyo, ingonman ang pagkwenta sa angayang dugang presyo matag adunay lihok sa pangkalibutang merkado. Tungod niini, gisugyot sa blokeng Makabayan nga idetalye sa mga kumpanya sa lana ang basihan sa ilang pagpresyo ug ihikyad sa publiko ang impormasyon.

Ingonman, kinahanglang ibasura ang ₱10 nga dugang buhis sa gasolina nga gipahamtang niadtong Mayo taliwala sa pandemya aron makakolekta kuno og pondong pang-ayuda. Kinahanglan usab nga ibasura ang nauna nang ₱10 nga excise tax sa gasolina, ₱6 sa diesel ug ₱3 sa matag kilo sa LPG nga gipatong sa 12% nga value added tax.

Presyo sa lana, misangko sa langit ang pagsirit
n/a