Ang Bayan
April 21, 2021

2 sibilyan ginpatay, 6 gin-aresto sa Negros

Share and help us bring this article to more readers.

Liwat nga nagsabwag sang teror ang gintingub nga pwersa sang pulis kag militar sa tatlo ka sityo sang Barangay Nagbinlod, Sta. Catalina, Negros Oriental sang Marso 29. Anom ka sibilyan ang gin-aresto, lakip ang 2-tuig nga bata, kag duha ang ginpatay. Pareho sa nauna nga mga kaso sang pagpang-atake sa mga sibilyan, gintamnan sang pusil kag eksplosibo ang mga balay sang mga biktima kag gin-akusar sila nga mga myembro sang Bagong Hukbong Bayan (BHB).

Ginpatay sa Sityo Balog sa nasambit nga barangay sanday Fredo Binangkil kag Julito Solano sa pagpanalakay nga ginpagwa nga engkwentro sa tunga sang militar kag BHB. Sa mga sityo sang Payawpawayan kag Bayog gin-aresto ang mag-asawa nga sanday Marites kag Benjie Saingga kag ila 2-tuig nga anak, Wilmar Jiminez kag duha pa ka mangunguma.

Kadungan sini, ginreyd sang mga pulis ang balay ni Nene Solano, pinuno sang Kilusang Magbubukid ng Pilipinas-Negros Oriental, kag ginbakol ang iya ugangan.

Pagpamomba. Grabe nga kahadlok ang gindulot sang anum ka beses nga paghulog sang bomba sang AFP sa mga komunidad sang mga mangunguma kag Lumad sang Abril 6 sa Barangay Kasapa II, La Paz, Agusan del Sur. Pila ka beses man nga gin-istraping ang matalon nga bahin sang lugar. Halin pa sang Pebrero ginalighot sang mga pwersa sang 60th IB kag 26th IB ang dulunan sang La Paz, Loreto kag San Luis sa Agusan del Sur kag Kapalong sa Davao del Norte.

Pagpatay. Ginluthang kag napatay si Jesus Pason Jr., drayber sang traysikel kag residente sang Basurahan, Barangay Mambulay, Silay City, Negros Occidental sang Abril 17. Katapu siya sang Pasil Homeowners Association, Inc. kag Kadamay-Negros.

Iligal nga pag-aresto. Sa Eastern Samar, gin-aresto sang 52nd IB sanday Erwin Ramirez Mortal kag Pablito Lapesora Libanan sang ulihi nga semana sang Pebrero sa akusasyon nga katapu sila sang BHB. Pareho nga residente sang Casapa, Barangay Dinigpian, Dolores ang duha ka mangunguma.

Sa Bohol, gin-aresto si Oscar Balonga, pangulo sang Bongbong Farmers Association sang Abril 7 kag ginkulong sa Trinidad Police Station.

Pagdukot. Gindukot sang mga ahente sang NTF-ELCAC sanday Alicia Lucena kag Sofia Bangayan, mga myembro sang Anakbayan, pagkatapos pakadtuon sang mga upisyal sang Barangay 483 sa Maynila sa barangay hall para kuno sa randomized swab testing sang Abril 19. Gilayon nga ginhilway si Bangayan samtang si Lucena wala pa makit-an sang iya abugado kag mga abyan. Isa si Lucena sa ginhingadlan sadto sang NTF-ELCAC nga “ginkidnap” sang Kabataan Partylist kag Makabayan agud samaran ang mga aktibista. Anak siya sang ahente sang NTF-ELCAC kag tagapamaba sang grupo nga Hands Off Our Children nga si Relissa Lucena.

Red-tagging. Napilitan ang mga boluntir sang “community pantry” sa Maginhawa, Quezon City kag Pandacan, Manila nga temporaryo nga isira ang ila operasyon sang Abril 20 pagkatapos i-red-tag sang pulis ang ila mga aktibidad.

Ang community pantry isa ka porma sang pagbuligay sang pumuluyo kon sa diin boluntad nga nagahatag ang may mga ekstra nga pagkaon kag libre ini nga kuhaon sang sin-o man nga nagakinahanglan. Gin-umpisahan ang inisyatiba nga ini sang Abril 15 nga nag-engganyo sang paglunsar sang 300 pa nga kapareho nga inisyatiba sa nagkalainlain nga pungsod.

Antes sini, nangin target man sang red-tagging ang mga unyon sang mga empleyado sang Senado kag Korte Suprema, kag ang Alliance of Health Workers.

AB (2021-04-21): 2 sibilyan ginpatay, 6 gin-aresto sa Negros